Den 2019 DIMAS a trata un total di 14715 peticion di e asina yama permisonan regular cu por ta permisonan tanto di trabao como permisonan cu no ta mara na trabao. Banda di esey DIMAS a haya acerca, un total di 1985 peticion pa asilo.
Segun directora di DIMAS, Kathy Ruiz-Paskel, di loke ta e permisonan regular por bisa cu 88% ya caba ta trata, di cual 77% a duna un contesta positivo. Tin 10% ta negativo y tin ainda pendiente un cantidad di peticion den 2019 di 11%.
Loke cu a paga tino cun’e den 2019 ta entre otro e termino cu tin pa atende cu cada peticion. Esaki a cambia den ley na fin di aña 2018. Consecuentemente ta midiendo si ta cumpli cu e normanan nobo cu ta stipula den ley.
Na principio tin cu trata e peticionnan den un termino di seis siman y cu un maximo di 10 siman. Esaki no tur ora por logra cumpli cun’e. Tin cierto factornan cu ta for di man di DIMAS tambe cu ta haci cu e termino tin ora ta pasa e 10 simannan.
Un di nan ta cu e cliente mes por opta pa entrega un peticion cu no ta completo. E ora ey lo mester warda pa mand’e un carta y dun’e termino pa e cumpli cu e documentonan cu e falta.
Hopi biaha ta un documento di e departamento di DPL of por ta un comprobante di su entrada for di Departamento di Impuesto.
Riba esaki, den 2020 lo bay traha mas cu e departamentonan ya menciona, pa haci’e asina posibel via contractonan digital, por obtene e informacionnan y asina baha e presion riba e cliente cu tin cu bati na diferente porta di gobierno pa haya e informacion pa DIMAS por procesa su peticion.
Tambe ta importante pa menciona cu DIMAS lo bay enfoca den 2020 riba loke ta innovacion, con ta comunica cu e cliente. E parti di e-mail personal ta bira hopi importante y esencial pa cada cliente tin esaki.
Ya caba a cuminsa siman pasa cu duna orden di pago por medio di e-mail personal. Asina tambe ta bay haya e comprobante di entrega y notificacion cu permiso ta cla. Asina e ta bay poco poco, segun e lunanan ta pasa, ta e implementando e portal.
DIMAS ta sigui traha pa yega den e termino cu ta indica den ley. E ta tambe un tiki na e cliente pa haci su pasonan di antemano, pa asina DIMAS por tin e informacion na su disposicion, pa e por trata e permiso tambe y duna un decision na ora.
Esaki, segun Ruiz-Paskel, ta un interaccion entre DIMAS y e cliente unda cu DIMAS di su parti lo sigui inverti den duna training na su personal como parti di dunamento di servicio, ta na altura di e cambionan di ley y conocemento di e materia.
Y di otro banda, guia e cliente den e procesonan nobo cu ta bay rekeri cu nan ta bay tin mester haci uzo mas di medionan digital pa por accesa producto y servicionan di DIMAS.
Eynan ta e enfoke pa e aña aki. Lo bay traha riba e dunamento di servicio y e parti di duna den un termino cortico, ta parti cu DIMAS lo tin pa e aña aki.
