“Un rato pasa mi a compaña mr. Dirk Ormel, abogado di Digicel di e bufete De Cuba & Wever na Corte di prome instancia di Aruba pa entrega un caso contra e carta di Minister Crispino Romero fecha 16 di october 2019. Di e forma aki Digicel lo laga Corte determina si e argumentacion di e decision di e Minister ta conforme ley y e reglanan estableci di entre otro bon gobernacion”, asina abogado mr. Lincoln “Dello” Gomez, den su calidad di Presidente-Director di Digicel Aruba a duna di conoce. Por a premira e caso aki caba, mirando cu deliberadamente Gobierno ta nenga di contesta peticion di e compania pa haya licensia pa ofrece servicio di “Fiber pa Bo Cas” na su clientenan.

“Pronto e Minister lo wordo yama pa presenta su defensa y despues lo sigui e tratamento di e caso unda Minister Chris Romero lo tin chens di defende su actuacion den Corte. Digicel tin confiansa den su posicion huridico y cu Corte lo rechasa e actuacion di Minister Romero y habri caminda pa e comunidad di Aruba por haña mas y miho scogencia den tecnologia”, di acuerdo cu Dello Gomez.

“Contrario na lidernan di paisnan manera Chile y Panama cu recientemente, en conexion cu e proyecto di Google, pa mehora servicio di Internet, a percura pa regla licensia pa promove desaroyo, mientras aki na Aruba e Minister ta stagna y frena desaroyo tecnologico. E ultimo aki hasta a bay asina leu di ignora ordo di Corte pa mas cu 2 aña, cu ta contra regla di bon gobernacion y cu no ta aceptabel den un estado di derecho”, asina Dello Gomez a termina bisando.

Comments

comments