Diamars 9’or di mainta tabatin e caso di 5000 kilo di cocaina confisca dilanti Hues. Pero esaki a tuma luga Pro Forma.
Ley ta prescribi cu den tanto tempo un persona acusa di un delito mester bini dilanti mesa berde. Esaki tabata e caso diamars di e grupo di tripulantenan di un barco Griego confisca pa motibo di a haya un cargamento di cocaina abordo. Esaki a sosode dia 26 di februari ultimo, fecha riba cual a para e barco di hero bieu Aressa CLICK AKI Maniobra sospechoso cu e barco tabata haci, a pone cu autoridadnan internacional a cuminsa vigila e operacion. Na final a confisca 200 bulto den cual cada un tabatin 25 paki di un kilo. Si mantene e calculo cu Ministerio Publico di 25 mil euro pa kilo, e cargamento aki tin un balor di 125 miyon florin.
Ley ta exigi pa un persona deteni presenta den Corte den cierto tempo despues di su detencion. Esaki basa riba Tratadonan internacional cu ta bisa cu e sospechoso mester sa mas lihe posibel kico ta para di su caso. Pero debi na problema di e crisis di COVID-19 hopi di e casonan pendiente no a keda cla, ya cu Polisnan tabata hopi ocupa.
Den e caso di e tripulantenan di Aressa, cu ta nabega bou di bandera Griego, e tratamento Pro Forma a tuma luga via di video conference pa motibo logistico. Aki ta trata di en total 11 acusado, kendenan ta:
Zeljko DRAGISIC; Mihailo DORDEVIC; Dragoljub ZIVKOVIC; Nicola MARKIC; Tripo BISKUPOVIC; Andrija MUGOSA; Vasco RADONJIC; Nicola MARTINOVIC; Zoran GOJKOVIC; Vidoje LATKOVIC y Dragan MASANOV
Dies di e acusadonan aki ta representa pa Abogado mr. Chris Lejuez y e otro door di mr. Arendsz-Marchena. Tratamento di e caso ta sigui dia 2 di october awo.
E barco Aressa tabata transportando hero bieu y tambe cantidad grandi di droga bon scondi.
