Durante un ceremonia den fin di siman, mando di Cruz Cora a entrega certificado na un grupo di boluntario cu a participa den nan curso entrega.
Cruz Cora a cuminsa cu un curso dia 16 di october y e curso a termina dia 16 di december. Un total di 23 participante a forma parti di e curso aki 3 biaha pa siman 3 ora y mey cada biaha. E tabata practica y teoria, segun Marla Thiel-Dominguez, coordinado di opleidingen & trainingen di Cruz Cora Aruba.
E participantenan a haya hopi materia den casonan di emergencia. Tur aña ta renoba e certificado aki y haci cursonan nobo, en bista cu na januari carnaval ta cuminsa y pa tur hende ta bon prepara pa e temporada.
Di e 23 cursista, 6 no a termin’e cu exito, pero tin 17 EMR nobo den Cruz Cora, segun Thiel-Dominguez.
Fuera di e curso di EMR tabata tin 6 boluntario tambe cu a haya e oportunidad pa sigui un curso di EMT. Nan a haya e curso tambe di “ambulance rijden”, pa nan por a certifica pa core ambulance tambe, na momento cu e ambulance di Cruz Cora ta riba caya.
E 6 participantenan aki tambe a ricibi nan certificado.
Tin mas of menos 50 boluntario den Cruz Cora, Thiel-Dominguez a splica.
Temporada di carnaval tin hopi mas hende riba pia, dependiendo di e actividad, manera eleccionnan di reina, tin mas of menos 20 boluntario cu nan ta uza. Pa actividadnan mas chikito tin 8 of 10 hende, dependiendo di e multitud di hende cu ta spera.
Durante paradanan grandi tin por lo menos di 40 pa 60 hende riba pia, tanto den ambulance, riba rapid response, riba bicicleta y tambe esnan cu ta cana riba e ruta.
Cruz Cora tin un bon cooperacion cu ImSan. Nan tin mayoria ambulance y Cruz Cora tin e personal riba ruta. Ta traha tambe via un centrale post y depende kico e pashent tin, e gravedad, e ora Cruz Cora ta comunica cu ImSan, caminda nan sa exactamente unda nan ta. Mientras cu ta stabilisa e pashent, personal di ambulance ta bin y ta bay cu e pashent.
E siman aki ta bay tin un reunion cu ImSan, pa asina pone a punto riba mesa. Nan a bin ta trahando asina durante e ultimo dos añanan.
Pa bira boluntario
Pa tuma e curso di IMR bo por ta boluntario di Cruz Cora y bo por ta un hende di pafo tambe. Naturalmente un boluntario di Cruz Cora tin mas bentaha. Nan ta paga un suma minimo y si nan gradua, nan ta haya e suma ey bek.
Pero si bo ta un hende di pafo, e ora bo ta paga pa e curso.