Diescuatro bus nobo ta drumi ainda den garashi di Arubus

40

E ta incomprendibel cu despues di a yega Aruba mas cu un luna pasa, ainda e busnan nobo no a subi ruta. Nan ta bunita staciona na Arubus, mientras cu e bieunan ta para den garashi ta niester un cantidad prome cu nan logra subi caya.

E Team di 24ora.com a bin ta hayando varios yamada mustrando riba e hecho cu tin dia muchanan no ta yega scol of ta yega scol laat pa motibo cu bus a daña prome cu a recoge nan of a daña na caminda pa scol. Y esaki a straña principalmente mayornan pa motibo cu a bin ta dunando hopi publicidad pa compra y yegada di un cantidad grandi di busnan nobo.

Arubus kier haci Fiesta sin placa y muchanan sin bus pa yega scol

Posted by 24ora on Monday, September 9, 2019 

E situacion di e busnan ta basta malo. Trahadonan mester cuminsa traha hopi tempran y tinr biaha for di 3.30 prepara e busnan pa nan subi e rutanan, cuminsando 5’or of 5.30. Pa logra esaki nan mester start e busnan un ora of mas prome cu nan subi ruta, pa sigura cu nan ta subi caminda. Gastando un cantidad grandi di combustible, cu sa basha di e motornan. Y no ta tur ora nan ta logra subi ruta pa cual mester haci yen di cambio. Tur esaki siendo cu tin 14 bus.

A wordo mustra na 24ora.com cu e busnan ta completamente cla pa subi ruta. Nan tin hasta number pega caba pero nan ta dornando garashi keto bay. Buscando mas informacion, a bin tende cu e busnan finalmente lo subi caya otro luna. Ta sperando pa haci esaki durante un celebracion dia prome di october ora cu Arubus cumpli 40 aña di existencia.

Y esaki ta loke cu empleadonan ta cuestiona seriamente. Ta bay gasta hopi placa, cu Arubus no tin, den un celebracion. No mester lubida cu Arubus ta un compania cu ta haya subsidio di Gobierno. Pues no tin placa pa haci nada extra di mantencion y awo kier celebra 40 aña di Arubus, cual placa por uza pa garashi di Arubus. Y evita cu muchanan ta wordo perhudica.

Ta imposibel cu tin busnan cu a paga asina hopi placa pa nan, y cu ta cla pa subi caya pero no ta haciendo uzo di nan, perhudicando pasahero y muchanan cu no ta yega na ora scol. No mester lubida cu aki ta trata di busnan cu a costa miles y miles di florin.