Go Cultura Foundation lo tene nan Foro Cultural diaranson, 16 di juni, den Cas di Cultura. Durante e foro aki e fundacion e enfasis y importancia riba e balor di cultura y creatividad. Asina ta pone esaki na e curason di desaroyo sostenibel di Aruba.
Edjean Semeleer, co-fundador di Go Cultura, a splica cu di e diesdos partido politico participante den eleccion parlamentario, dies partido a anuncia nan presencia. Nan candidato lo ta presente pa presenta nan vision pa cultura, pa industria cultural y creativo. Durante e foro aki e dies partidonan, Accion 21 cu representante Raymundo Dijkhoff, AVP representante Michael Lampe, MAS, MEP cu Xiomara Maduro, POR cu Rigo Sint Jago, PPA cu Lisette Malmberg, RAIZ cu Ivan Croes, RED cu Kinsasha van der Bliek, PUEBLO PROME cu Marcel Peña, UPP cu Sergio Marin.
Esaki ta un foro y no un debate, Semeleer a subraya. E diferencia di e foro aki ta cu lo sinti e ta mas un combersacion unda cu e partidonan lo presenta nan vision y lo haci pregunta. E publico presente tambe lo por haya oportunidad pa haci pregunta durante e ronda final.
Amy Richards, co-host di Ban Papia Cultura y Moderador di Foro cultural, a splica cu nan a prepara algun pregunta hopi specifico pa atende cu e preocupacionnan den e sector industria di creativo y cultural. Nan a sondea den sector pa mira e retonan cu e creativonan a topa cu ne y pa esaki e politiconan por spera algun pregunta e.o. relaciona cu turismo, creatividad den enseñansa, innovacion y maneho p’e aspecto cultural.
Algun siman atras Go Cultura a lansa un encuesta y esaki ta pa midi e percepcion di hende p’e industria, Thaïs Franken, co-host di Ban Papia Cultura y Moderador di Foro cultural, a indica. Ta curasha pa participa na esaki, p’asina nan por tin mas dato kico hende ta pensa di e industria di creatividad y cultura y con nan lo move e siguiente añanan.
