Un caso sumamente serio ta esun cu a tuma luga awe den Corte. Un caso cu a cuminsa cana despues di un asesinato, of maltrato pisa cu a caba na morto cometi door di un tata cu a bay defende honor di su yiu muhe. Marvin Charles Stennett, tata di Marlon Stennet (def), a presenta diabierna mainta den Corte cu 4 acusacion contra dje.
A acusa Stennett di a comete actonan inmoral cu un menor (su yiu muhe menor di edad), di violacion di e amiga di su yiu homber Marlon, violacion di su casa (hunto cu su dos yiunan) ora cu e señora no tabata practicamente na tino y posesion di pornografia di mucha riba 29 y 30 di mei 2019.
Na mei aña pasa Marlon (+) a permiti pa su tata tene relacion sexual cu su amiga, contra boluntad di e mucha muhe. E victima a declara cu e tabata den camber cu Marlon, ora cu el a sinti cu tin un hende mas den eyden y e persona un rato despues a cuminsa haci cosnan cu su dede di pia. Despues el a haya sa cu ta e tata di Marlon. Durante e acto aki Marlon a duna su tata permiso pa tene relacion cu e mucha muhe, mientras cu esaki a bisa no.
Den e prome declaracion cu e acusado a duna na Polis, el a bisa cu esaki ta parti di nan cultura pa tene relacion cu e muhe of amiga di sea e yiunan of e tata. Asina por ehempel, a haya un video den su celular unda e acusado aki hunto cu su dos yiunan homber, inclusive Marlon cu a fayece, a tene relacion sexual cu casa di e acusado. Y riba e video, segun Fiscal a bisa, ta mira cu e muhe no ta na tino (bou influencia di probablemente alcohol). E casa despues a entrega un keho tambe ora cu el a haya sa di e video, pasobra e mes no tabata sa kico a pasa y a bisa cu e ta haya e cos aki algo hopi desagradabel, pasobra e muchanan ta su hijastro.
E acusado a bisa cu el a laga su yiunan tene relacion cu su casa pa motibo cu nan tabatin problema cu nan sexualidad.
Pero tambe Polisnan a haya potretnan pornografico di un mucha menor di edad cu a resulta su yiu. Tin un potret di mucha muhe cu un penis den su boca. Na Polis ora cu a mustr’e e potret el a bisa “esey t’ami”. Awe casi un aña despues el a bisa den Corte cu e persona riba e potret ta su yiu homber cu a fayece.
Fiscal no ta kere nada y a bisa cu e pruebanan ta papia pa nan mes. Por ehempel, e amiga di su yiu homber Marlon, a keda den un trauma asina grandi cu ora el a yega su cas su mayornan a ripara di biaha cu e ta straño. Un amigo cu a bini cerca e victima a bisa cu a dura casi dos ora prome cu e por a saca for di e mucha muhe kico a pasa cu ne. Polisnan tambe a duna un version igual. Na momento cu e tata a haya sa cu su yiu a wordo viola door di Marvin cu apoyo di Marlon, el a bay regla cuenta cu Marlon cu machete den man. E lesionnan a resulta mortal pa Marlon. Por corda cu e tata a bay entrega su mes mesora y a splica pakico el a actua asina. Polisnan e ora a bay busca e yiu muhe, pero e no por a papia di e tema pasobra e tabata hopi traumatisa.
Tur esaki a haci cu Fiscal a bisa cu e no tin motibo pa duda den declaracion di e victimanan, di loke nan a mira riba potret ni den loke e mes a admiti den su problema declaracion.
Mirando e seriedad aki, Fiscal a pidi 10 aña di castigo. Aki tres siman tin sentencia den e caso aki.
