“Diaranson a haya informacion cu tin un conspiracion andando na aeropuerto cu tin un grupito atrobe ta tratando di bin cu un otro sindicato den AAA NV.” Diego de Cuba, presidente di STA, a bisa esaki y a expresa cu e no sa kico ta nan meta.

Awor ta den e periodo cu tin di bay cuminsa negosha un contracto colectivo cu AAA. Tur hende ta liber pa scoge kende nan kier pa representa nan. Loke STA ta lamenta den tur e cosnan aki cu nombernan a cay di hendenan cu ta IAOer, kendenan ta esnan cu ta tras di e conspiracion. Esaki siendo cu IAOer ta practicamente forma parti di gerencia, cu ta hinca den e conspiracion aki. “Ta pa algo cu STA no tin arte di parti den esaki. Nan ta conspirando contra STA, firma un documento caminda cu a bay di acuerdo pa AAA kita cierto derecho di e trahadonan cu no ta berdad. Nan ta pretendiendo cu tabata tin un caso den Corte cu e grupito aki a gana, cual no ta berdad.”

Diego de Cuba di STA: Tin un conspiracion andando den AAA NV

Diego de Cuba di STA: Tin un conspiracion andando den AAA NV. Click link pa mas https://24ora.tv/2YSMyBc

Posted by 24ora on Friday, July 12, 2019

De Cuba ta bisa cu tur e polemica aki a start, ora bo ta haya un empleado cu por cobra callback. E ta bisa cu si  bo ta on call, bo no por cobra call back. Den AAA tabata tin un fenomeno caminda cu e hendenan cu tabata on call ta raporta call bek. Nan ta haya 475 florin pa nan ta on call. Ora cu nan yama nan bin traha, nan tabata raporta call back. Nan tabata come dos biaha di e bolo. Administratie a cay atras y administratie a bisa cu e cos aki no ta bon. Ora e trahadonan a bin na e sindicato y a bisa cu AAA kier cobranan e placa cu nan a cobra dimas, a logra convence AAA cu e fout aki ta di ambos banda pa no cobra nan, sino haci uzo di un herment cu ta poni den CAO relaciona cu e tipo di casonan asina. “Pero e grupito ey a rabia cu STA y kier hinca un otro sindicato aden pa algo, pa infraccionnan cu nan a comete. Apesar cu STA a yuda nan pa nan no paga bek asina mes nan ta sinti nan mes frustra cu STA no a bringa pa nan keda haci e fout aki.”

STA a logra convence AAA pa no cobra e trahadonan aki  y a trek e record straight. Esaki ta di tres biaha cu conspiracion ta wordo fomenta bao di cierto hendenan contra di STA. Nan ta custumbra cu esaki caba. No ta prome biaha cu a haya yamada di miembronan cu ta fiel na e sindicato. A puntra nan ta ki locura esaki ta y de Cuba a contesta cu tur hende tin di dicidi loke nan kier. “E sindicato no por forsa un hende. Si bo kier keda cu STA bo ta keda, si bo no kier, bo ta bay. No ta kere cu e trahadonan di AAA, mirando e CAO lucrativo cu nan tin awor aki y na bispo di negociacionnan nobo di CAO, ta bay comete un locura di bay cambia di sindicato, coriendo e riesgo cu nan por perde tur locual cu tin den e Contracto colectivo aki. Ta yega un momento cu gerencia ta bisa cu un sindicato nobo drenta, ta cuminsa na zero. E ora ta perde tur cos. Den pasado el a yega di pasa.” De Cuba ta adverti tur hende cu esaki a yega di pasa den pasado cu e compania AGS, caminda cu nan a bay cu e sindicato SEPPA y nan a perde tur tur cos. A pasa ocho aña sin cu nan por a logra cera un CAO. E trahadonan di AGS a perde saco y cangreu. Nan a perde nan vakantie uitkering, nan bonus di fin di aña, placa di yiu, tur cos, segun de Cuba.

Mester ta hopi cauteloso, ora cu tuma decisionnan emocional. Decisionnan emocional por tin consecuencia p’abo. Experiencia a siña cu tin momento cu mester keda hopi sereno den bida pa por atende miho cu e situacion. Tin ora decisionnan emocional por ta desastroso p’abo. STA no tin miedo di referendum. STA a yega di bay 55 referendum, durante e trayectoria cu de Cuba a presidi. A gana 53 y tabla dos. Un referendum no ta nada nobo y ta custuma cu e proceduranan aki caba. Ta spera cu esaki no tuma luga pasobra e ta trece un division den e compania na mal ora, e sindicalista a termina bisando.

Comments

comments