Mirando cu e cantidad di cifra pa accident registra den e prome tres lunanan di 2025 ya ta na 2458 accident nos coleganan di 24ora Kevvin Valderrama y Diego Lugo a probecha e bishita di mr. Gerlien Croes y mr drs. Arthur Dowers na Universidad di Aruba pa puntra tocante trafico sigur na Aruba y dicon esaki no ta den plan di gobernacion di AVP-Futuro.
Tambe nos a puntra mr. Gerlien Croes, como un di e formadonan, dicon no a yama Vereniging Rijschool Aruba pa dialoga durante proceso di formacion. E mandatario Croes a splica cu no a logra sinta cu tur organisacion pasobra nan ta hopi pero cu a yega na un acuerdo pa cada minister sinta cu e diferente organisacionnan cu tin di haber cu nan ministerio. Den e caso di trafico sigur el a splica cu mr Dowers lo elabora riba su maneho pa cu trafico na Aruba.
Despues di entrevista cu e vice-rome minister (y formador), a sigui pa mr Dowers kende a splica cu trafico semper tabata un priorididad den nan gobierno y cu nan semper a dedica tempo y esfuerso na dje. Mr Dowers a splica cu mirando e situacion actual di trafico na Aruba e sigur lo duna atencion na esaki. Pues nos ta spera cu e gobierno nobo por inclui trafico sigur den nan plan di gobernacion y tuma e decisionnan necesario pa e topico importante aki.
