E cantante, autor di letra y compositor Gilbert ‘Dibo D’ Doran hunto cu e pianista, compositor y areglista Randal Corsen ta na punto pa bolbe lansa un proyecto inovativo den e arena musical. No unicamente nan kier demostra cu musica no tin limite, pero nan kier sigui tambe halsa y duna honor na nos mesun musica y nos idioma Papiamento. ‘Muziek sin Barera’ ta e siguiente proyecto dje duo.
For di e concierto di 100 aña MCB na 2016 Dibo D y Randal Corsen a desplega diferente proyecto y producto hunto, cada un cu exito. Hunto nan a bay cu e titulo maximo di Festival di Tumba 2019 cu a pone cu Dibo a bira Rey di Tumba cu Randal como su areglista y director musical. A sigui mas producto y presentacion, tambe cu Randal su banda RCO y Dibo su banda ONE Flavaz.
E produccion conhunto nobo, ‘Muziek sin Barera’, ta consisti di grabacion di un cantidad di tema; algun original di Dibo y Randal mes, pero tambe algun tema clasico. Por ehempel, a graba un tema di Rudy Plaate y a buta algun poema di Dibo su opa Gilberto ‘Beti’ Doran riba muziek. Den e proyecto aki Dibo y Randal a mescla influencianan di muziek popular cu muziek contemporaneo, creando un zonido fresco y nobo. E publico ta haña un mescla/fusion entre ritmonan di Corsou pa scucha cu muziek clasico, jazz, latin, urban y pop.
Gran parti di e grabacion a tuma luga na e prestigioso Power Sound Studios na Amsterdam, caminda grabacionnan pa produccionnan di varios artista grandi manera Michael Jackson, 50cent, Phil Collins y Metropole Orkest a tuma luga. Eynan a graba por ehempel canto, piano, seccion di ritmo consistiendo di algun di e miha musiconan di Hulanda, y un string orchestra cu a partisipa den tur e piesanan. Grabacionnan adicional pa Muziek sin Barera a tuma luga na Corsou na Source Recording Studio cu colaboracion di varios musico/artista manera e urban producer Slick, e percusionista Pernell Saturnino y e trompetista Igort Rivas.
Pronto lo lansa e prome tema di e proyecto aki, acompaña pa un music video produci pa e director cinemategrafico Selwyn de Wind. Keda pendiente pa mas informacion y por sigui e proximo pasonan di Dibo y Randal y tambe di ‘Muziek Sin Barera’ riba rednan social.
