Diasabra y Dialuna marduga botonan a trece ilegalnan Aruba

E problema di botonan di Venezuela cu ta yega Aruba cu ilegalnan no a caba ainda. El a slow down un poco desde cu dos hende a muri. Mientrastanto a manda e mensahe pa tur hende compronde cu esaki no ta e mihor forma pa busca un mihor biba.

E cos a  calma y tabata tin extra control tambe. Minister di husticia den conferencia a haci anuncio cu hopi show. Mientrastanto cos a calma un tiki atrobe riba e controlnan cu tabata intensivo pa algun dia. Hopi lo a kere cu di pazuid nada mas ta biniendo. Esaki no ta e caso. Diasabra y Dialuna marduga tabata tin entradanan di boto. Na Guadirikiri a haya hende ta cana. Polis a topa cu un solo hende.

E restonan cu a yega Aruba a disparce. Esaki ta ful un otro area cu kizas no tin 100% vigilancia riba dje. Polisnan mes a keda busca pa basta rato diasabra mainta sin cu a topa hende. E personal di Parke Arikok tambe a wordo avisa pa tira bista. Un dia despues nan a bin topa cu tur e pañanan y cosnan cu a wordo laga atras. Kiermen ilegalnan a yega tera cambia paña y sigui nan caminda.

Dialuna marduga tambe e personal di Polis y Kust Surveillance cu ta consisti di Polis y Douane a subi caya. Den Sero Colorado tin boto a drenta atrobe. No a haya hende. Asina mes nos por confirma cu hende a yega marduga. Nos a papia cu hendenan cu por garantiza sigur cu ilegalnan a drenta. Ta hendenan cu a wordo saca caba den pasado entre otro a drenta bek.

Hendenan cu conoce e ilegalnan mes a confirma cu e otronan a yega marduga den boto y cu nan a papia cu nan telefonicamente. Kiermen e frontera actualmente no ta 100% sera. E cotrabando di hende a bolbe cuminsa for di pazuid y por confirma entrada Diasabra y Dialuna marduga.