Diasabra tin encuentro di pashentnan cu Epilepsia

172

Diasabra awo dia 9 di November 2019 Stichting Epilepsie Aruba (SEA) lo tene un otro encuentro social pa personanan cu tin epilepsia y tambe pa esunnan cerca di nan. E encuentro ta tuma luga manera custumber na Centro Kibrahacha na Piedra Plat 23 y lo ta di 10.00am pa 12.00pm. Entrada ta gratis.

E intencion ta pa tin contact entre esunnan cu tin epilepsia y nan famia y ser nan keri pa intercambia experencia- y eventual problemanan cu e desorden celebral aki por causa. Pasobra lastimamente, te ainda, papia riba e tema aki ta un taboe na Aruba mientras en absoluto no mester tin miedo of berguensa pa bin dilanti cu tal situacion. Al contrario, papiando riba e tema aki por yuda un persona cu tin epilepsia anda miho cu e problema aki.

Y hustamente esey ta proposito di SEA: Duna mas tanto informacion riba e tereno aki. Y no mester lubida cu epilepsia no ta nifica fin di mundo pa un persona cu haya e condicion di salud aki pasobra e por hiba un bida normal basta e sigui instruccion di su Dokter y tuma su remedi manera instrui.

Na e encuentro aki e neurologo Dr. Emile Keuter, un autoridad riba epilepsia, lo presenta un charla riba e tema aki y lo contesta eventual pregunta cu e presentenan por tin. 

Importante ta pa menciona cu SEA lo no trece nada di loke wordo papia durante e encuentro den publicidad. Y asina tur hende por trece nan puntonan den tur confiansa cu loke bin dilanti e mainta ey, no ta pa publica. Tur hende ta bon bini!