Diaranson 31 di juli 2019 ta ultimo dia pa haci cambio pa e Buki di Telefon 2020

Si e nomber di un negoshi of di un cliente no ta aparece corectamente den e buki di telefon, ainda tin chens pa cambia esaki pa e Buki di Telefon 2020. Pa haci e cambio necesario clientenan por pasa na cualkier Teleshop cu nan identificacion valido.

E deadline pa registra nomber y adres corecto pa publica den e edicion di Buki di Telefoon 2020 ta diaranson 31 di juli 2019. Actualmente e registro di nomber ta bai segun e nomber y adres cu ta registra den e data base di SETAR.

Den e buki di telefon di SETAR e usuario por haya tur informacion tocante producto y servicionan di SETAR di telefon di cas, celular, Internet y cable. Ademas tin den e buki di telefon e rekisitonan pa por aplica pa cualkier servicio di SETAR y e localidad y orario di tur SETAR su Teleshopnan. Den e seccion di pagina blanco “white pages” ta haya tur number di telefon fiho di cas of negoshi (cu no ta priva es decir cu no ta “unlisted”), tambe number di celular cu a wordo pidi pa ta listed.

Den e seccion di “yellow pages” ta haya informacion y
number di tur negoshi na Aruba den nan diferente categorianan. Ademas di esaki e buki di telefon tin e “community pages” den cual por haya informacion y number di tur departamento di gobierno y fundacionnan, y otro informacion valioso. E buki di telefon aki ta accesibel tambe online na www.arubayp.com.