Awetardi un grupo cu ta representa e docentenan hunto cu sindicatonan SEPPA y SIMAR a reuni cu Prome Minister mr. Evelyn Wever-Croes riba e problemanan den enseñansa. E reunion a bay den bon esfera, cual e docentenan a aprecia masha. Mañan lo tin un reunion den nan propio seno.
E reunion a bin pa baha e tension cu tin actualmente den enseñansa, debi na e maneho y forma di maneha di Minister dr. Rudy Lampe. Ta sinti di e docentenan, cu no kier papia cune mas y ta prefera pa cambia e Minister di Enseñansa. Motibo ta cu e no ta tene su mes na palabracionnan y no tin e minimo idea di kico e ta haciendo den e ramo di enseñansa.
E docentenan a bisa despues di e reunion awetardi cu nan ta sinti cu porfin tin un Minister cu a papia cu nan y cu ta compronde nan. A papia riba tur e puntonan di preocupacion y hasta mas. Nan ta sinti cu Minister Presidente ta totalmente otro. Nan a sinti cu a tuma nan na serio, ta anota y tuma notula, cu normalmente Minister Lampe no ta haci.
Awo tur loke nan ta wardando ta un reunion cu Presidente di Parlamento, mr. Ady Thijsen pa mira ki pasonan nan tin cu tuma, mirando cu no tin comunicacion entre e docentenan y e Minister. Imagina un team caminda cu e miembronan di e team, no tin confiansa den nan teamleader. Asina ey e team no ta funciona!
Pero por lo general por bisa cu e docentenan ta optimista pa loke ta e combersacionnan cu nan a tene cu Prome Minister. Definitivamente nan no kier pa enseñansa wordo stroba. Pasobra ta nan mes na fin di dia tin cu ruim op de boel. Al fin y al cabo ta maestronan ta y tin cu keda profesional!
