Durante un conferencia di prensa cu a tuma luga na Fort Zoutman, e fechanan di e festivalnan di Dande Infantil, Hubenil y Grandi a keda anuncia.
Digicel y RBC ta e sponsornan principal di e festival grandioso aki. Durante di e conferencia aki, representantenan di Departamento di Cultura, Digicel, y tambe e comision organisador di Festival di Dande a hiba palabra.
Stan Dabian, a splica cu e festival di Dande, e tradicion aki, no mester muri. Como Comision Celebracion Dianan Nacional y departamento di Cultura, cu ta bao di e auspicio di e ministerio di asuntonan economico, finansas y cultura, ta duna e apoyo na e festival aki pa varios aña, tanto logistica y dunando e parti facilitario na e actividad aki.
E festival ya ta existi pa varios aña caba. 45 aña esun di adultonan y 17 aña esun di e hobennan. Departamento di Cultura ta contento di por aporta na esaki. Dentro di e prioridad di departamento di cultura, cu ta e educacion di arte y cultura, Dande ta un folklore cu nos tin cu keda stimula y haci un yamada na henter pueblo di Aruba, nos hendenan local, pa duna apoyo na e festival, pa acudi na e festival aki, hiba bo yiu, bo nietonan na esun infantil/hubenil y bay cu henter bo famia, bo amigonan y rumannan, na esun di adulto.
Esun di hubenil lo tuma luga na Centro di Bario Tanki Leendert, cual lo ta riba dia 27 di December y riba dia 28 di December lo bay haya esun di e adultonan, cu lo bay tuma luga riba Plaza Betico Croes.
Departamento di Cultura ta hopi contento pa duna apoyo na e festival aki.
Aporte di Digicel
Delo Gomez, como representante di Digicel, no mester lubida di unda nos ta bin. Nos ta bin di Aruba, nos ta bin di historia, nos tin nos raiznan aki y esey tabata un di e motibonan pakico a dicidi di para un rato y pone schouder banda di e comision cu ta organisando Dande.
A dicidi cu ta bira e momento pa Digicel tambe para banda di esaki y yuda carga e evento asina importante aki di nos cultura.
Ta na su luga tambe, un compania cu ta profila su mes den telecomunicacion, tecnologia, y cosnan moderno, ta bon pa no lubida di unda nos ta bin. Dande ta un tradicion cu nos tur a lanta cun’e.
Organisacion di Dande Hubenil
Pa loke ta e organisacion di Dande Infantil y Hubenil, esaki ta di 17 aña cu e ta wordo organisa. Esaki ta un parti esencial pa por mantene y traspasa nos cultura, nos herencia cultural di un generacion pa otro.
Segun Ray-Anne Hernandez, awor aki ta preparando pa e festival dia 27 di December. Esaki lo cuminsa pa 6’or di atardi na Centro di Bario Tanki Leendert. E ta premira pa caba pa 12’or di marduga. Diahuebs, dia 13 di December, pa 7’or y mey, lo bay ta e unico dia di inscripcion. Tur mucha di edad di 4 te cu 17 aña por inscribi. Mester por tin un tipico cu por compaña nan.
Lo mester tambe un ID cu nan fecha di nacemento pa por tuma e inscripcion. E inscripcion lo tuma luga na Digicel Tanki Leendert.
Esaki lo dura te cu 8’or y mey di anochi. Pa 9’or di anochi lo tira lot di biaha cu lo bay determina e secuencia di e tipiconan cu lo presenta dia 27 di December. Cada tipico cu presenta, por presenta tambe cu loke ta wordo yama un composicion di fin di aña. Esaki mester ta uno original, na Papiamento, den un ritmo tradicional cu nan ta usa ora di pasa cas pa cas tambe pa entretene e famia.
Mester tambe sa e titulo di esaki, e nomber di compositor y nomber di areglista.
Dia di e festival lo bay tin cuater diferente categoria. Categoria di 4 pa 6 aña. Categoria di 7 pa 9 aña, 10 pa 12 aña y 13 pa 17 aña. Den cada categoria lo saca un rey y tambe lo saca e composicion di fin di aña for di esunnan cu e diferente tipiconan a presenta.
Festival di adulto
E festival di adulto lo tuma luga dia 28 di December, riba Plaza Betico Croes. Jessica Croes, yiu muhe di Harry Croes, kende pa 45 aña tabata motor di e organisacion di festival di Dande, ta siguiendo e mesun pasonan di su tata. El a splica cu Dande ta un di e culturanan di nos. E cultura di mas bieu cu nos conoce. Pa un festival asina grandi, no ta facil pa haya ayudo y pa por organisa. Ta pa e motibo aki e ta gradici tur esnan cu a brinda nan aporte.
E anochi grandi mes, manera menciona, dia 28 di December, lo cuminsa pa 8’or di anochi. Aki lo bay tin rey y reyna di dande kendenan lo ricibi placa cash. Tambe tin e festival tipico y propio composicion di fin di aña.
Ta invita tur esnan interesa pa inscribi, cu lo tuma luga dia 19 di December na Digicel Tanki Leendert, pa 6’or y mey di atardi te cu 9’or di anochi. Esaki lo ta e unico dia pa e inscripcion. Riba e mesun dia aki tambe lo bay tira lot.
Meta di e festivalnan aki ta, pa cada aña engrandece nos dande. Cada aña kier pa e dande crece mas. Pa e pueblo sigui cu nos dande y kier pa e dande keda semper original.
No kier pa e dande cambia. Cada biaha nan kier pa hinca algo nobo. Si cada biaha bay hinca algo nobo den e dande, aki un dies aña e dande ta full moderno. Pesey no kier pa e dande cambia y keda original.
Pesey ta pidi pa tur hende coopera cu e dande pa e dande keda un dande original. Esey ta nos cultura di dande, segun Croes.
Tambe kier invita tur hende pa bin e anochi aki. Lo bay tin feria, tentnan di cuminda y bebida. Tambe lo bay tin tentnan di cos dushi na benta. Pa esnan cu kier huur tent, por acerca departamento di cultura.
Asina ta, marca dia 27 y 28 di December, den bo agenda. Mustra cu bo tin dande den bo curason. Ban mantene nos dande pa asina nos herencia cultural no bay perdi.
