Cas di Cultura tambe a sinti e efecto di e crisis di Coronavirus y pa e proximo temporada, nan mester adapta nan mes na e situacion nobo pa awo y cierto preparacionnan of plannan cu tabatin, mester pospone nan. Vicky Arends, directora di Cas di Cultura, nan a refleha hopi con nan por drenta den operacion manteniendo e reglanan nobo.
Asina a haya un Protocol cu ta uza na Hulanda pa maximalisa e uzo di e sala, adaptando na e infrastructura di Cas di Cultura. Sinembargo e ta algo cu mester sigui analisa ainda pa motibo cu e adaptacion ta nifica cu mester haci cierto inversion. Nan ta bay cuminsa test e operacion cu algun evento chikito dianan 11 y 12 di juni cu concierto den e sala chikito. Asina ta haya chens pa test con e protocol ta bay den espacionan chikito.
E ta un Protocol cu ta special pa espectaculonan y ya caba Cas di Cultura a pone esaki na disposicion di Departamento di Salud pa studia esaki.”Pero, manera bisa, e ta exigi algun inversion.”Cas di Cultura a traha un set-up cu personal di DVG mester bin analisa. Aunke, segun Arends, a haci tur cos segun criterianan cu mester mantene. Despues di aprobacion di e set-up, lo cuminsa traha pa trece eventonan rapido bek na Cas di Cultura. Henter e crisis a trece cu nan mester a cancela 25 evento.
Awor ta preparando y combersando cu e personanan concerni pa mira cual di e eventonan aki lo sigui den e periodo di augustus pa december, kisas cu dos show enbes di un anochi, pa mantene e distanciamento social.Tur esaki ta trece cu ne un deficit den nan operacion, ademas cu a corta nan subsidio tambe.Hustamente tabatin plan pa haci un renobacion grandi di Cas di Cultura. Tur e deseo y soñonan aki mester tuma luga den un forma mas chikito.
