Diamars awo dia 26 di mei pa 9:00am, lo tuma luga un reunion decisivo den Parlamento. E organo mas halto di nos pais lo atende un reunion publico, e di 23 reunion publico pa e aña parlamentario 2019-2020, den cual a invita Minister dr. Armando “Rudy” Lampe pa bin duna cuenta di su maneho. E invitacion ta menciona specificamente “Uiteenzetting door de Minister van Onderwijs, Wetenschap en Duurzame Ontwikkeling over de huidige situatie in het onderwijs”. Ta un reunion cu por bay den tur direccion, tambe den un cu por pidi retiro di e Minister!
Fraccion di AVP na varios ocacion a pidi un reunion publico pa atende cu e maneho specificamente di Minister Rudy Lampe pero pa un of otro motibo nunca Parlamento ta yama e reunion. E fraccion di MEP mes tambe a pidi varios reunion pero constantemente e Lider di Fraccion di RED, Ricardo Croes, ta logra convence Presidente di Parlamento, mr. Juan “Ady” Thijsen pa djis yama un reunion di Comision Central pa por papia cu e Minister y lag’e splica su maneho. Pero ultimo tempo e relacion cu Parlamento tambe a empeora basta, specialmente despues cu el a expresa eyden di ta sinti cu Parlamento ta strob’e maneha enseñansa manera cu e kier y cu di awo padilanti e lo tuma decisionnan y despues informa Parlamento.
Entre e Parlamentarionan cu hopi biaha tabata skerpi contra maneho of decisionnan di Minister Dr. Rudy Lampe den enseñansa ta specificamente Edgard Vrolijk y Sue-Ann Lacle-Ras (tempo e tabata Parlamentario ainda), pasobra ambos ta bini for di e sector di enseñansa y como tal conoce e materia. A cuestiona varios decision di e Minister, sin cu necesariamente a logra convence pa e cambia e decision of tene nan peticionnan na cuenta.
Diamars mainta, ta net un siman di awe, den cual e ultimo dianan aki enseñansa ta bou critica pisa di tanto docentenan como tambe di mayornan, pa no lubida e studiantenan mes. Ta parce cu e mandatario ta logrando pa haya tur hende contra dje, hasta den e forma con e kier maneha enseñansa memey di e pandemia, den cual e ta tumando decisionnan pisa cu lo tin envergadura grandi pa e sector aki.
Den caso cu e no logra sinta na mesa cu e partnernan e siman aki ainda pa calma e emocionnan y no logra sinta na mesa specificamente cu SIMAR y SEPPA, anto lo por spera un reunion cu por caba cu un mocion di desconfiansa cu lo cost’e su cabes y carera como Minister. Ya mañan e sindicato di maestronan a organisa un marcha di protesta, cu ta specificamente contra Minister Lampe mes y como tal lo por spera cu docentenan tambe lo ta sinta den publico otro siman pa presiona Parlamento pa cambia rumbo di enseñansa awo!
