Awe ta ultimo dia pa entrega declaracion y paga winstbelasting 2019

Awe dialuna, dia 1 di juni 2020, ta ultimo dia cu por entrega e declaracion di winstbelasting 2019 y haci e pago di winstbelasting corespondiente. E fecha final aki ta valido pa tur instituto financiero manera banco y compania di seguro. Si e compania no ta alcansa pa entrega e declaracion definitivo dia 1 di juni 2020, e ora mester entrega e declaracion provisional (voorlopige aangifte).

e caso aki tambe mester cumpli cu e pago di winstbelasting di acuerdo cu e declaracion provisional entrega. E fecha final pa entrega e declaracion provisional y haci e pago corespondiente ta 1 di juni 2020. Solamente si entrega e declaracion provisional y haci e pago concerni, e ora automaticamente e cliente lo haya  6 luna mas di tempo pa por completa y entrega su declaracion definitivo.

Compania cu no ta instituto financiero

E fecha final di 1 di juni 2020 lo tawata valido tambe pa tur otro compania cu ta cay bou winstbelasting, pero di acuerdo cu e stipulacion den e Plan di Alivio Fiscal 2020, e companianan cu no ta un instituto financiero ta haya te cu 30 di november 2020 pa entrega e declaracion y haci e pago di winstbelasting cu ta coresponde cu e ganashi genera den aña 2019. Apesar cu a extende e termino cu 6 luna, Departamento di Impuesto ta recomenda tur cliente cu tin nan declaracion di winstbelasting 2019 cla, pa entrega esaki y no warda te na ultimo.

Incumplimento

Si no cumpli cu entregamento di e declaracion of e declaracion provisional, e cliente lo haya un cobransa adicional esta un ‘naheffingsaanslag’ inclui boet. Esaki tambe ta e caso si acaso e cliente a paga un suma menos cu locual el a declara na winstbelasting. E boet pa no cumpli cu entregamento di e declaracion ta maximo Afl. 2.500. Si no haci e pago di winstbelasting of no haci e pago corectamente, e boet ta maximo
Afl. 10.000.