Dialuna no a lanta diferente cu cierre di diabierna. Accionnan di ilegal y accion di personanan malcontento cu FASE y Subsidio di Salario. Un accion na Departamento di Labor di personanan di Youth Contractors y Hard Rock Cage, kendenan a keda den un limbo, ni salario, ni subsidio di salario ni FASE.
E grupo a bin ta hayando apoyo di Rodrigo Tromp kende tin un Facebook page yama Conflicto Laboral Puntrami. Tromp a pone bon cla cu e no ta Abogado. Sinembargo e tin hopi experiencia den e ramo aki y ta duna conseho na trahadonan cu tin un problema cu nan doño di trabou.
Tur personanan cu aserk’e, e ta referi nan na Departamento di Labor cu e puntonan di atencion cu mester pidi pa nan. Asina den tur e personanan cu a tuma luga contacto cu ne, el a bin realisa cu tin masha hopi doño di trabou cu ta abusa di e situacion. “Mi tabata sa cu tin abuso, pero nunca mi tabata sa cu e tabata asina hopi,” el a duna di conoce. “Practicamente mayoria di doñonan di trabou ta abusa di e trahadonan.”
Asina el a bin di situacionnan unda cu doño di trabou ta haya subsidio di salario, pero ta hinca esaki den pakete di retiro. E tristo ta cu ta intimida e trahadonan pa tuma e pakete.
Banda di esey, tin un grupo di persona cu a perde nan trabou y te ainda no a haya ni un florin di FASE. Pues tres luna caba sin ningun salario ni otro entrada.
Entre e manifestantenan di awe mainta tin un gran parti di persona trahando na Hard Rock Cafe, pasobra no ta hayando nada y tampoco informacion di kico ta bay pasa awo.
Tromp ta bisa cu e ta sinti cu tin un burocracia ya cu Youth Contractors a pidi subsidio di salario. Si el a haya of no, tin duda. Tin trahado a tende cu nan a haya e placa pero a gasta esaki, y mester paga bek. Y a tende tambe otro version cu nan no a haya subsidio di salario. Pues trahadonan ta sin entrada y den un incertidumbre di kico ta nan situacion.
Tristo ta cu tin trahado ta duna nan empleadonan un “voorschot” y riba esaki ta cobra nan interes. Pues ora cu haya e subsidio, mester paga bek, loke ta normal, pero tambe e interes. A pone bon cla cu esaki no ta permiti. Pero tambe tin trahadonan ta traha mas ora cu normal, sin cu ta haya pago extra. Tin e SPA-nan cu ta tuma hende como “freelancer”, pero nan no tin ningun derecho. Asina tin hopi empleado cu no tabata y no ta registra na SVb.
