Banco Central di Aruba a bin ta organisando diferente sesion di informacion relaciona cu introduccion di e biyetenan nobo. E siman aki tin dos sesion programa di cual un a tuma luga diamars y e siguiente ta diahuebs anochi. Penelope Tromp Gomez a splica cu nan “roadshow” ta pasa den diferente bario, haciendo uzo di e MFA-nan. Diamars nan tabata na Noord y dia 15 awor,esta diahuebs, e team di Banco Central ta bay ta na Sta Cruz.
Den e simannan cu ta bin lo sigui cu e sesionnan di informacion na Biblioteca Nacional, Theresita Center y organisacion of fundacionnan cu tambe a pidi pa suministra informacion na nan miembronan.
Banco Central a saca hopi brochure y flyer pero nan ta keda pensa cu ta hopi importante pa splica e hendenan personalmente tur e detaye y caracteristicanan di e biyetenan y con a yega na dje. Ta importante pa cada ciudadano ta consciente cu e biyete cu e tin den su man y no uno falso. Y e reaccionnan ta hopi positivo.
Nan a sinti cu tin hopi mas interes cerca e hendenan di edad, kendenan a mustra hopi interes pa haya informacione exacto di e biyete nobo pero tambe riba e cambio pa entrega e biyetenan bieu. Nan ta haci hopi mas pregunta tambe. Y proximamente nan lo ta duna informacion na miembronan di FAVI tambe.
Datonan cu nan a bin ta acumula ta mustra cu nan a recoge caba un 70% di e placa bieu cu tabata den circulacion y nan ta spera cu nan por haya e resto den un tempo cortico. Nan tin te december pa bay un banco comercial pa cambia e biyetenan bieu pa esnan nobo.
E siguiente sesion di informacion di diahuebs 15 di augustus na MFA Sta Cruz entre 6’or di anochi y ta invita e bario di Sta Cruz pa acudi.
