Diahuebs awo reunion extraordinario cu tur ambtenaar den Wilhelminapark riba indexering

Presidente di SPA, Jose Dirksz, conforme e mandato cu a haya di su miembronan pa algun siman caba a bin ta reuniendo hunto cu otro sindicatonan riba e tema di indexering. A base di esaki e presidentenan di sindicatonan den ambtenarij, a dicidi pa haci un reunion extraordiario diahuebs awo, di 9’or pa 11’or di mainta den Wilhelmina Park.

Mirando e magnitud di e ambtenaarnan cu lo bay ta presente, ta tiki dificil pa haya un luga pa por acomoda tur hende. A base di esey a dicidi di haci’e den un luga mas abierto, caminda cu por haya tur hende y tur hende por ta informa adecuadamente riba e situacion reinante.

SPA ta sigui lucha pa Indexering y Polis ta contra legalizacion di Marihuana

Posted by 24ora on Tuesday, November 19, 2019

Desaroyo nobo

Dirksz no a bay en detaye riba e tema aki, mirando cu ta prefera pa tur hende t’ey presente riba e fecha aki pa asina divulga e ultimo desaroyonan y pa esaki no sosode via prensa. Tambe kico tur e miembronan ta desea pa e sindicatonan sigui cun’e. Pasobra na fin di dia tur sindicatonan ta traha den nomber di e miembronan.

Reunion cu gobierno

Diabierna ultimo tabata tin un reunion cu gobierno. SPA a asisti na e reunion aki, caminda cu gobierno a bin cu un propuesta y esey ta loke lo bay papia den e reunion diahuebs awo cu tur e miembronan.

Dirksz a menciona cu ta sinti cu no tabata tin mucho adelanto durante e reunion aki pa no bisa casi nada. Ta p’esey mes kier opinion di e miembronan di kico nan kier pa haci, kico ta e proximo paso.

Miembronan di SPA

Loke cu miembronan di SPA a trece padilanti, pa loke ta indexering, en principio ta cu e standpunt ta pa keda riba 101 den salario pa luna pa tur ambtenaar. Dirksz no ta kere cu esey lo baha mas cu esey, mirando tur loke nan a perde caba. Ta papiando aki di 2018, e 3.6% di inflacion. Pa loke ta 2019, tin inflacion caba segun CBS. Pero esey mester negosha den futuro.

Si sigui warda pa 2025, esey no ta aceptabel. Tambe ta bay wak kico ta e decision final di e miembronan, esta tur ambtenaar kico nan kier pa haci.

Invitacion

Den e caso aki e invitacion ta bay pa tur ambtenaar pa bay Wilhelminapark di 9’or pa 11’or di mainta.

No tin e intencion di cana bay cas di gobierno, pero si haya e mandato di parti di e miembronan, no ta exclui esey tampoco.