Fundacion Ban Educa y Prepara di Derecho Humano, trato igual y cero discriminacion lo tene diadomingo dia 9 di December nan evento di derecho humano y ta invita henter pueblo di Aruba pa yega na e evento aki.
Esaki ta pa motibo cu derecho humano ta pa tur hende, di cual a crea esaki pa ser humano. Manera cada hende ta celebra nan nacemento pa tin 1 aña mas di bida, tin cu mira e mesun importancia pa celebra e derechonan ora cu nos ta na bida.
E actividad di diadomingo aki ta cuminsa desde 5:00pm unda lo sali for di Santa Teresita Center San Nicolas. Hunto cu Massive Brassband lo sali pasa den e cayanan di Promenade San Nicolas y ta sigui e ruta te ora yega YMCA San Nicolas y aki e actividad lo continua pa 6:00pm. Lo tin diferente orador cu lo papia ariba derecho di mucha, derecho di hende muhe y homber, derecho di trahado y derecho general, asina Astrid Vries, president di Fundacion Ban Educa y Prepara, a bisa.
“A scoge e oradornan aki pa motibo cu ora nos a nace nos tabata mucha”, el a bisa. Esaki ta nifica cu como mucha, e tambe tin su derecho pero un mucha ta crece pa bira homber y muhe. Como homber y muhe bo mester sa bo derechonan tambe y ta bira trahado tambe. Como un trahado e tambe mester sa su derechonan di trahado y derechonan general. Segun Astrid Vries, derecho humano ta bisa pa no mira loke ta haci e influencia, sexualidad, no mira condicion fisico, color politico, no mira nacionalidad y genero. “Nos no mester mira esey”.
Ta loke mester mira ta cosnan cu ta haci daño na otro, esta no discrimina, no mata, no horta, no gaña y hopi mas. Como ser humano nos ta igual y mester trata otro igual tambe. E dia aki lo ta uno historico pa muchanan, pasobra ta hopi importante p’e muchanan sa cu nan tin derechonan. Hopi biaha ta celebra carnaval y e muchanan ta sali unda nan ta gosa y baila riba caminda. “Laga e muchanan sali baila y gosa pa loke ta nan derecho, tambe pa nan sa e trato cu nan mester duna na otro y crece ta hopi importante.” Esaki ta pasobra nan ta esun cu ta bira e homber y muhenan trahado di dia di mañan. For di chikito mester lanta e mucha ta habri y laga nan ta forma parti di un evento, un actividad cu ta e derecho humano.
Durante e evento aki e muchanan por haci pregunta riba e dia aki, kico ta celebrando, dicon ta riba caya y hopi mas. E mayornan por splica nan cu nan tin derecho como mucha tambe. Asina aki por splica nan cu e discriminacion di bully no por existi ni na scol ni niun caminda. Actualmente tin hopi problema na scol cu e situacion di bully y na momento cu esaki ta den muchanan di chikito nan haci esaki. Ta importante pa nan sa cu esaki ta cosnan cu no mag di haci ni cu otro hende haci esey cu nan.
E fundacion ta invita mayornan pa bin cu nan yiu(nan), mama cu tata(nan), wela y welo(nan), amigonan y henter comunidad di Aruba pa yega diadomingo awo pa 4:30pm na Santa Teresita Center. Pa 5:00pm e caminata lo sali compaña pa Massive Brassband y bay direccion YMCA. E anochi aki diferente orador lo papia di derecho humano y tambe lo tin un show chikito cu Nico Connor y hopi mas.
