Cuerpo di Bombero ta den nan siman di Prevencion di Candela, cu ta relaciona cu e celebracion di Dia di Bombero, cu tabata awe 9 di october. Vocero di Cuerpo di Bombero Ferdinand Ponson a splica cu e celebracion a cuminsa dia 29 di september ultimo, ora cu tabatin e exitoso Boulevard Loop.
E prome evento aki a “sold out” den algun dia y a conta cu participacion di mas cu 850 persona.
Siman pasa diabierna a tuma luga Seso Sport na kazerne di bomberonan na Tanki Flip, cu a conta cu participacion di shete grupo, mientras cu diaranson mainta tabatin un servicio religioso dedica na tur Bombero. Den oranan di merdia pa atardi tabatin un Dia Familiar na ex Club Don Bosco na Dakota.
Actividadnan cu ta pendiente ta un parada grandi prepara pa diabierna awor. E parada aki ta sali pa 4.30 for dilanti The Paddock y ta bay caba dilanti Parlamento. Ta pidi pueblo bin compaña e Bomberonan riba e dia aki, bistiendo un t-shirt cora. Na final tin algo refrescante pa e participantenan na Wilhelminapark.
Diadomingo tin e ultimo evento cu ta un Opendag di Brandweer pa cual ta invita henter pueblo di Aruba pa acudi. Ta bay mustra con e Hoogwerker ta funciona, e autonan di spuit lo duna un show di e trabou cu nan ta haci, materialenwagen tambe. Banda di esaki lo tin diferente entretenimento y “foodcourt” pa e bishitantenan.
E evento di diadomingo lo ta for di 10’or di mainta pa 5’or di atardi.
