Pa 12 aña Lyonel Dirksz ta presenta e miho cancionnan di aña riba 30 december dunando tur honor y reconocimiento na e cancionnan di mas grandi tanto local como internacional. Durante e programa maratonico, cu ta cuminsa 9:00am via Radio Bo Guia 88.9FM, lo tin pronostico di signonan zodiacal mientras cu riba caya lo ton Julisa y Brian pa bishita diferente casnan den barionan di Aruba.
Atardi lo tin presentacion di e grupo tipico Brindis dilanti studio na Tanki Flip, compaña pa Robert Thiel y Jeon, tata cu yui ambos cu cancion nomina pa cancion di aña 2018. Massive brassband lo cera e happy hour dilanti studio. Pa 9:00pm lo ta live for di Palm Beach Plaza Mall pa saca e ganado di 1000 florin na premio sigui pa pagara.
E transmicion bibo riba radio y television lo tin un duracion di 14 ora cu premio, entrevista, noticianan mas impactante di aña y reconocimiento. Cu esaki Lyonel ta gradici pa e confiansa, celebrando 15 aña den radio.
Tocante Lyonel Dirksz
Lyonel Dirksz a cuminsa como un hoben na Canal 90 FM na aña 2004, pero a muda 2 aña despues pa Radio Top 95.1 FM, unda el a keda presenta su programanan pa 12 aña largo. Desde dia 22 di januari 2018 a inicia un etapa nobo pe den su carera na Radio Bo Guia 88.9FM. Cu 14 aña di experencia na radio, Lyonel Dirksz ta percura pa brinda oyentenan programanan di cual e ta hinca su curazon completamente den e produccion.
Tocante Radio Bo Guia 88.9FM
Radio Bo Guia 88.9FM ta situa na Tanki Flip y ta un di e poco radionan cu ainda ta garantisa un porcentahe halto di su programacion dedica na nos folklore y cultura. E radio, maneha pa Mimi Rosell-Koolman a bay den aire na November 1997 y como tal a celebra 20 aña di existencia. E ta conta cu un elenco di presentadonan, locutornan y DJnan capas pa entretene tur tipo di generacion y gusto di oyentenan.
