Diabierna Noord ta eligi su Reina y Princesita den CBN

Centro di Bario Noord tradicionalmente tin su eleccion di Reina/Princesita di Noord. E aña aki e lo ta diabierna awor dia 10 di Januari 2020.

Ariba e anochi aki CBN lo corona nos Reina Infantil di Noord y lo elegi nos Princesita Noord.

Pa 6:00 pm porta di CBN lo habri. Entrada lo ta Awg. 5,- en general. Tema di nos eleccion y Carnaval 55 di Noord ta “Noord ta dushi”. Nos eleccion semper ta haya sosten di nos dushi districto di Noord y nos ta crea un dushi ambiente den e patio di CBN.

E Reina Infantil cu lo keda Corona ta bay representa nos districto di Noord na Stadion. E princesita cu keda elegí lo mester dicidi si otro aña e ta bay competí pa Reina Infantil di Aruba su Carnaval pa aña 2021.

Manera ta custumbra tur participante ta haya un sjerp, corona y regalito na final di eleccion, pasobra riba nan mes tur ta un Princesita.

Durante e anochi aki a Scol di Hunga Chikitin Bin Bin lo Corona nan Reina y nan Prins cu Pancho.

Aruba completo, specialmente nos dushi districto di Noord ta keda cordialmente invita pa bin presencia nos tradicional eleccion di Reina. Nos ta warda boso!