Fundacion Ban Educa y Prepara, derecho humano, trato igual y zero discriminacion, kier a invita henter E Pueblo di Aruba pa huntu nos celebra Dia di Derecho Humano 2018.
Riba e fecha: 9 di December cu ta riba un diadomingo, nos lo uni pa celebra e dia di derecho humano conhunto cu un concientisacion y informacion riba e tema tan importante manera di derecho humano. E proposito di e celebracion y e concientisacion di Derecho Humano ta pa mobilisa y uni e pueblo pa nos ta conciente cu Derecho Humano ta pa tur persona cu ta biba riba e pais aki y cu tur derecho cu tin para den ley ta derechonan cu nos tur tin derecho ariba dje. Asina mes e derechonan aki ta wordu nenga na algun persona cu ta den nos comunidad.
E anja aki cu ta nos di dos annual nos a pone como e lema:
“Ningun persona mag di ta sin derecho”
Derecho Humano ta: Sin mira rasa, creencia, color, edad, genero, sexualidad, nacionalidad, idioma cu bo ta papia, color politico, condicion fisico. Pa kiko e palabra “Sin mira”? pa motibo cu ningun di e puntonan aki ta e motibo pakiko a crea derecho humano. Derecho humano a wordu crea pasobra nos ta humano y como humano nos tin derecho riba tur loke e pais ta brinda na e bienestar di e ser humano y e leynan aki ta mara tambe cu e proteccion di e ser humano. Esun cu mira e puntonan aki y nenga e ser humano su derecho cu e tin, ta robes bezig. Loke si nos tin cu “Mira” ta e tratonan cu ta inhustu. Nos tin cu “Mira” actonan cu ta contra di ley. Ta e actonan cu ta contra di ley ta haci danjo na e ser humano.
Actonan manera tur tipo di Violencia, tur tipo di Abuso, no mag discrimina, no mag bully, tampoco no mag comete actonan manera mata, horta y destrui un otro ser humano. E actonan aki nos tin cu para contra di nan. Ta hopi importante pa nos sa cu unda cu nos bai den mundo, como ser humano den e mundo nos derecho ta keda igual. Nacion Uni a jame derechonan universal. No mag trapa ni mag nenga e ser humano su derecho cu e ta titula pa e tin pa e solo hecho cu e ta un ser humano. E articulonan ancra den ley ta pa un y tur.
Nos ta start sali 5 pm for di Santa Teresita Center San Nicolaas unda cu Massive Brassband lo compania nos den e selebracion aki unda cu e pueblo por cana, baila, bula y gosa riba su dia y nos lo haci esaki den e ruta cu ta e caminda di promenade san nicolaas jegando te na e retonde sigi te ora cu nos jega na YMCA San Nicolaas. Na YMCA San Nicolaas 6 pm e evento aki ta continua unda cu nos ta bai tin diferente orador pa papia riba e topico di derecho humano. Derecho di mucha, derecho di hende muher, derecho di hende homber, derecho di trahador, derecho general sin haci distincion di ningun persona. Nos tin un bon programa hinca den otro y lo tin benta di snacks y non alcoholic drinks. Por sigi nos riba nos facebook page Arubahumanrightsforall, por tuma contacto cu nos tambe via cellular 593-3156 of email: [email protected]
Un Aruba Uni y bon informa lo haci un diferencia pa nos Futuro Generacion.
