Dia di Betico 2020 exitoso na Museo Arqueologico Nacional Aruba

A reina un dushi ambiente na Museo Arqueologico Nacional Aruba (MANA) riba Dia di Betico.  Un 266 local y  21 turista a disfruta di e exposicion permanente di  Aruba su arkeologia. E exposicion temporario Lasonan Caribense a ricibi 240 bishitante.

Arkeologo drs. Harold Kelly a duna un bista hopi mas amplio na  35 interesado di Aruba su arkeologia durante su guia den e salanan di exposicion permanente.  Ela  splica resultadonan nobo cu a sali for di investigacionnan mas recien y a enfoca riba dibuho riba baranca.  E historia di migracion pa Aruba cu a cuminsa cu  e prome habitantenan mas o menos 1460 aña prome cu Cristo  y ta sigui pa varios otro gruponan di Indjan prome cu yegada di Spañonan.  Esnan presente a keda impresiona cu e informacion nobo. 

Pa e dia special aki MANA a habri su espacio di trabou di e seccion Investigacion y Registro. Aki den arkeologo drs. Raymundo Dijkhoff   a demostra y conta 39 intresado di algun artefacto cu tin lasonan Caribense.  E obhetonan  no ta den e exposicion permanente ni den esun temporario, pero si tin vincula cu nan.  Esnan presente  a haya informacion  adicional y a haci preguntanan specifico na e arkeologo.

Algo mas cu  50 mucha y hoben a expresa nan creatividad y a relaha un rato ora cu nan a decora y verf  un mascarada.  E mascarada tabata inspira pa e amuleto Indjan chikito di cocolishi den sala di exposicion permanente. Despues di e actividad aki hopi di e muchanan a bay admira y mustra nan mayor e amuleto aki.

Algun persona a bay cas contento cu e ultimo publicacion cientifico den e serie di MANA, esta “The Archaeology of Aruba: The Pictographs and Petroglyphs”. E publicacion aki tin un inventario tambe di pinturanan riba baranca hunto cu e historia di documentacion di e pinturanan cual a inicia desde 1827. E tesoro aki a wordo bendi door di Fundacion 1403 y ta obtenibel tambe na MANA. MANA ta gradici publico pa pasa riba e dia nacional cerca nos y en especial su boluntarionan y su brigada hubenil cu a yuda haci e dia aki asina exitoso. MANA ta apela na e bishitantenan pa sigui promove y sostene arkeologia di Aruba.