Drone racing ta un deporte relativamente nobo pa chikito y grandi cu ta gusta e adrenalina core cu velocidad halto den nan curpa durante deporte di racing.
Pilotonan di drone ta usa brilnan special di video pa haya e asina yama first person view den e video di nan drone cu por bula riba 120 km pa ora. Wak un drone race cu speed halto ta un show mahestral y hopi realistico pa motibo cu drones ta asina bon manehabel.
Drone racing a tuma mundo over den forma relampago y e deporte innovativo aki por wordo mira riba canalnan grandi di deporte manera ESPN, EURO SPORT, FOX SPORTS y otronan. Premionan cash tambe ta den wega den e deporte aki, loke ta haci’e hopi atractivo. Na Aruba tin un organisacion di droneracing, FPV Aruba. E Arubiano Vince Irie hunto cu amigo y aficcionadonan di e deporte a lanta e organisacion aki pa di e forma aki Aruba tambe por ta parti di drone racing y yega un dia riba plataformanan internacional. Banda di ta un musico, Vince Irie ya pa tres aña ta un piloto di drone racing y a participa aña pasa so caba den mas di 15 pais rond mundo ganando diez biaha oro, tambe plata y brons y ta actualmente subcampeon Hulandes. E ta bula tanto solo como tambe den teamnan di liganan grandi. Vince ta hopi bon conoci den e escena mundial di droneracing.
FPV Aruba ta organisando pa di tres bes un evento di drone race. Esaki ta tuma lugar diasabra awor dia 26 di januari na e Aruba Vacation/Waterpark Park banda di Hooiberg den Sta. Cruz. Un dia prome, dia di Betico, lo tin for di 4or di atardi un show di drone presenta pa Vince Irie, ‘meet and greet’ cu pilotonan y splicacion con e race ta bay ta. E deporte di droneracing na Aruba ainda ta den ‘kinderschoentjes’ y FPV Aruba kier haci’e mas y mas conoci den comunidad. Pesey ta organisa sorto di actividadnan asina. Ta pesey mes tambe cu Aruba Vacation Park no ta cobra entrada e dianan aki pa asina atrae mas hende posibel. Dia 26 di januari e race ta start ya for di 9’or di mainta. E evento ta wordo filma y poni riba social media y e canalnan di droneracing manera Rotor Riot. E punto culminante ta bay ta despues di tres or di atardi ora e racenan final ta tuma lugar. Ta bay tin 16 piloto cu lo competi contra otro. Nan ta di Corsou, Hulanda, Trinidad & Tobago y Aruba.
FPV Aruba ta ofrece bunita premio pa asina duna e evento mas grandesa. Despues di e racenan y entrega di premio tur hende ta keda invita pa keda y pasa un rato agradabel cu e pilotonan y un Happy Hour na e bar mientras por gosa di dushi musica.
