FADA ta organizando un biaha mas nan conocido campaña di Red Ribbon Week, miho conoci como e siman di bisti na locura. Esaki ta un campaña cu a cuminsa cun’e 7 aña pasa pa conscientisa comunidad riba uso y abuso di droga y alcohol.
Rulienne Arends, trahado preventivo di FADA a splica cu nan kier haci’e na un manera diferente. Caminda nan tin nos mucha y hobennan por join unda nan por wak dicon ta haci’e, pakico ta bin cu un campaña asina.

Siman pa bista na locura ta un siman cu hopi hende conoce y ta papia di dje. Tin algun luna caba cu tin hopi persona ta puntra FADA kico por spera di e siman aki pasobra nan kier hink’e den nan schedule.
E siman ta cuminsa dia 21 di october. Manera tur aña ta bay tin un siman diferente, un siman di locura. Algun dia ta keda mesun cos. Esaki ta mirando e participacion con tur hende ta pidi pa no cambia e dianan aki pasobra nan gust’e masha hopi mes.

Dia 21 pa dia 25 di october ta bay ta e Siman di Bisti na Locura di FADA

Dia 21 pa dia 25 di october ta bay ta e Siman di Bisti na Locura di FADA. Click e link pa mas https://24ora.tv/33gqFOg

Posted by 24ora on Tuesday, October 8, 2019


Dia 21 di october, ta habri cu bistimento na cora. Mirando cu ta papia di e cinta cora, cu ta eynan el a cuminsa na Merca. Ta spera cu tur hende tin un articulo cora riba dje.
Riba e diamars, dia 22, tin un switch chikito. Riba diamars ta e dia di bisti na bo superheroe. Vooral e chikitonan ta gusta masha hopi mes. Nan ta bay scol cu nan paña di spiderman, superwoman of hasta ta bisti na piyama.
Dia 23 di october ta e dia cu a cambia. Tabata tin’e den pasado caba, pero mirando cu e tabata un exito a dicidi pa bin cun’e atrobe. Riba e dia aki ta Crazy Hairday. Esaki ta e dia pa tur hende ta creativo. Haci algo diferente cu cabey. Tin hende hasta a puntra, mirando cu nan a tira un bista riba poster, si nan mag di bin cu peluca. Usa boso creatividad. Esey ta meta di e dia aki.

Pa loke ta diahuebs 24, ta e dia di mas gusta y mas famoso di e siman di bisti na locura, ta e meanan colorido. Tin di bisa cu tur aña ta keda sorprendi pa loke ta e parti di mea. El a switch di ta meanan colorido, pa meanan creativo. Hopi hende ta bezig ta pone diferente wowo, boca, creando nan mesun mea. Esey ta loke cu FADA kier wak atrobe. Pues diahuebs, ta e dia famoso di e meanan colorido.
Y pa finalisa, manera tur aña riba diabierna, ta tuma e tempo y enfoca riba loke cu ta e lema di aña. Tur aña e lema di siman di bisti na locura, ta cambia. E aña aki no ta diferencia. E aña aki e lema ta “Send a message: Stay drugfree.” E diabierna ta e dia cu lo desea pa comunidad di chikito te na grandi pa manda un lema. Kico bo ta desea pa comparti cu un otro persona. Di tur dia, ta bay saca creatividad. Esnan cu tabata mas creativo, e mensahenan cu a haci un impacto tambe. Ta bay saca diferente ganado, manera cu ta haci pa tur aña. Cu ganado kiermen, varios compania cu ya caba a haci nan donacion pa loke ta premio.

Tin premionan individual, tin premionan pa famia y tin premio tambe pa scol, pa klas, pa gruponan grandi. Tin por ehempel un bus trip di algun ora. Un compania por gana esaki of un scol tambe por gana esaki. Tin di bisa tambe por ehempel, vooral pa e chikitonan, un dia na Philip’s Animal Garden. Vooral e muchanan ta bay enjoy.
E aña aki FADA a haya un donacion hopi special pa loke ta Taco Bell den e campaña di Pitch Time, di cual FADA a forma parti di dje. Ta traha loke ta e Red Ribbon Box. Esaki a wordo entrega na tur scol basico na Aruba, unda cu den e Red Ribbon Box aki ta bay tin diferente actividad, diferente informacion, p’asina nan por haci diferente cos cu e muchanan durante e siman di Bisti na Locura.
No solamente e parti di “ban enjoy y haci algo diferente”, pero ta hopi importante pa e informacion yega na e muchanan y comunidad.

Taco Bell

Robert Yara ta operation manager di Taco Bell y pa nan ta un orguyo pa forma parti di FADA. For di un inicio, nan a wordo acerca pa e proyecto di Cede Aruba pa Pitch Time. Nan a scoge pa e proyecto di FADA mirando cu e ta un proyecto asina interesante. Taco Bell ta acercando e mucha y hobennan pa conscientisa otro tocante uso di droga y alcohol. Esaki ta algo cu sigur ta contribui na e comunidad. E hende lo bay bira mas consciente tocante di e topico di droga.
Taco Bell a join e proyecto y ta hopi contento cu loke ta pasando rond di esaki, pasobra a mira un desaroyo for di e inicio cu tabata tin plan di trece Red box pa scolnan y a bisa cu esaki ta algo di caracter informativo, na unda cu ta bay envolvi tur docente pa duna informacion na e muchanan.
Fuera di esaki, cu e proyecto di siman di Bisti na Locura, cu sigur tur aña ta exitoso, mester bisa cu e algo sumamente creativo, algo cu e hendenan por bin cu su creacion di bisti na locura y algo cu sigur tur hende lo bay disfruta.
E ta un manera pa contribui na comunidad. Di e manera aki Taco Bell ta bisa danki na e comunidad brindando e apoyo di e compania na FADA. E ta un manera cu nan por duna bek na comunidad dunando y apoyando cierto proyecto manera esaki cu ta envolvi e comunidad en general.

Un invitacion

Comunidad completo ta invita pa forma parti un biaha mas pa loke ta e Red Ribbon Week pa di 7 aña. FADA ta pidi pa no solamente forma parti pa haci cosnan diferente, pero corda e parti mas importante. E ta conscientisa tur hende, conscientisa bo ruman, bo famia, bo amigonan, bo coleganan, e importancia pa bisa “no” na droga y alcohol.
Ta spera cu por haya tur hende pa join. Si bo ta bay forma parti full e siman of ta scoge un of dos dia, bo ta saca bo potret y share esaki riba FADA Aruba su Facebook, unda cu tin un team cla pa bay wak y pa tin e dolor di cabes pa saca e ganadonan di e siman di bisti na locura. Ta pidi tur scol, si ainda no a haya e folder di FADA, tuma contacto cu nan, sea via Facebook of por yama na 5832999. Lo percura pa haya e flyer di e siman di bisti na locura y tambe kier bisa cu si tin algun scol, pa un motibo of otro, no a ricibi e Red Ribbon Box, tambe comunica cu FADA di biaha, pa asina percura pa tur scol basico por tin nan caha pa e siman di Bisti na Locura.

Comments

comments