Diasabra dia 14 di April a tuma luga e di dos evento di “Aruba Bank Sport Clinic”, enfocando e biaha aki riba e disciplina di taekwondo. Aruba Bank y Comite Olimpico Aruba a bini hunto pa ofrece clinica pa mucha- y hobennan siña mas di diferente deporte. Desde 2016 Aruba Bank y COA ta enfocando riba e sosten di e vision y mision di e organisacion olimpico y nan principionan fundamental.
E di dos sport clinic a conta cu un participacion di mas di 20 mucha, cu a presenta pa cera conoci cu e atleta olimpico di taekwondo, Monica Pimentel. Desde prome cu 4’or di atardi e muchanan a cuminsa yega pa haya sa mas di e deporte taekwondo. Na comienso e muchanan a ricibi introduccion ken e atleta ta y nan a haya sa di su participacion den diferente competencia, manera Weganan Olimpico.
Durante e clinica di deporte e muchanan a ricibi hopi instruccion di taekwondo, e tecnicanan, nan tambe a practica kico tur nan a siña di taekwondo. E muchanan a ricibi un treat saludabel pa por tin suficiente energia pa sigui haci diferente tecnica di taekwondo.
Na final di e clinica di taekwondo, e muchanan a ricibi nan certificado di participacion den e clinica aki y un pin di COA. Nan tabata contento di e oportunidad cu nan a ricibi di siña mas di taekwondo. Aruba Bank a gradici Monica Pimentel di a duna e clinica di taekwondo y di a siña e muchanan mas di e deporte. E muchanan a pasa un momento ameno y dibertido
