Diadomingo ultimo a tuma luga e di cinco edicion di e Diabetes Run & Walk, cual a resulta di tabata un exito rotundo.
Diadomingo mainta, 13 di november, tur e 1250 participantenan tabata presente pa e Walk & Run, cumpliendo e meta di participante cu kier a alcansa pa e evento. Ademas di esaki, a logra recauda un total di AWG. 15,000 pa Fundacion Diabetes Aruba pa nan programa di prevencion y maneho di diabetes: PRISMA. PRISMA ta un programa special pa persona nan cu diabetes tipo dos cu kier tuma control di nan salud, crea un miho maneho di nan diabetes y preveni cualkier otro complicacion di salud.
E Diabetes Run & Walk ta un gran evento cu ta conmemora e Dia Mundial di Diabetes, cual fecha ta dia 14 di november tur aña. Ademas di participa den e careda, tabata tin ambiente di musica, cuminda saludabel di One Healthy You y ceremonia di premio.
Un palabra di gradicimento ta bay specialmente na Aruba Aloe kende, hunto cu Botica di Servicio, tabata e sponsor nan principal di e evento aki, y tambe na Subway como sponsor principal di e Kids Run.
Un danki tambe ta bay na cada un di e boluntarionan cu a saca di nan tempo pa yuda prepara pa e evento y tambe kende tabata presente durante e evento. Y sin lubida tur e participante cu a yuda contribui na e gran causa aki pa e conscientisacion, prevencion y maneho di diabetes, un problema grandi cu nos Isla ta maneha cu ne.
