Di-4 generashon Mensing ta representá Finlandia


For di 21 di yanüari último, e pais Finlandia den nort di Europa ta representá aki na Kòrsou pa e di kuater generashon di famia Mensing.

Señora Helvig van de Laarschot-Jonckheer ta tuma e batuta di su tanta Helga Mensing ku durante 34 aña na Kòrsou a sirbi komo kònsul honorario di Finlandia pa ‘Dutch Caribbean’. Den e kalidat aki el a sirbi durante 21 aña tambe komo dekano di e Kuerpo Konsulario na Kòrsou

For di 1985 señora Mensing tabata kònsul honorario pa Finlandia. Su abuelo i su tata tambe a okupá e posishon ei durante basta aña, di forma ku famia Mensing a representá Finlandia ya pa mas ku 60 aña. Esaki ta bai kontinuá, awor ku for di 21 di yanüari último señora Van de Laarschot-Jonckheer a bira e kònsul honorario nobo pa Finlandia situá na Kòrsou. Pa esei el a risibí e konsentimentu tantu di e Ministerio di asuntunan di eksterior di Finlandia komo di e gobièrnunan lokal, i esei a keda formalisá den un Dekreto Real.

En prinsipio e funshon di kònsul honorario ta mará na un edat máksimo di 70 aña, ku e posibilidat di prolongashon. Despues di dos prolongashon di kada be 2 aña señora Helga Mensing a haña ku awor si ta basta i el a bai buska un susesor. Den su mes famia el a haña un kandidato pa e puesto. Den e último tempunan aki su subrina, yu muhé di su ruman defuntu Vigdis Jonckheer-Mensing, a haña un preparashon debido pa okupá e puesto nobo. Djasabra último e traspaso ofisial a tuma lugá ora señor Helga Mensing a entregá e eskudo di Finlandia, e bandera  nashonal di Finlandia, un kantidat di otro dokumento i archivo relevante na señora Helvig van de Laarschot-Jonckheer. For di awor e konsulado Finlandes ta situá na Kaya Ventre 6 na Matancia, ku [email protected] komo direkshon di mail i aksesibel na number di telefon 560-0918. Señora Van de Laarschot-Jonckheer ta kasá ku e abogado lokal Paul van de Laarschot, ku ta kònsul honorario di Hungaria na Kòrsou.

Comments

comments