A pidi presencia di polis pa un homber cu actuacion hopi straño den cura di cas. E persona aki tabata mustra di ta riba un of otro substancia cu no necesariamente ta alcohol.
Polis a presenta na un cas na Madiki pa duna asistencia na doño di cas pa un persona cu ta huur apartamento serca nan. Ta conta cu e persona aki normalmente no ta comporta su mes di e forma cu awe el a haci. Su comportacion tabata straño, e tabata tur soda y papiando disparate. Pa nan propio trankilidad y seguridad a prefera di tuma contacto cu polis pa bin atende cu e homber aki.
Esaki a tuma luga den oranan di mainta, Den careda di 11:15 am, ora cu polis a presenta pa duna un man na e personanan den cas. A purba rasona cu e homber pero esaki tabata imposibel. No a keda ningun otro opcion cu detene e homber aki y transport’e pa warda di polis.
