Djadumingu 12 di yanüari 2020, alrededor 01.40’or di mardugá, durante patruya di Tim di Mantenshon di Órden Públiko den Kaya Dalder nan a duna shofúr di un vehíkulo ku dos okupante aden òrdu pa para.
E shofúr a neglishá e òrdu di polis i sigui kore. Polis a kuminsá ku un persiguishon i a los tiru di atvertensia pero e shofúr a sigi kore i bai dal kontra di un muraya i tur dos okupante a baha i kore bai for di e sitio. Despues di un búskeda kòrtiku polis a detené un di e okupantenan di e vehíkulo, e hòmber J.G.U., nasé na Kòrsou di 25 aña di edat.
A resultá ku e vehíkulo den kua e sospechosonan tabata kore ta un vehíkulo hòrtá. A presentá e sospechoso dilanti di un Fiskal Ouksiliar ku a ordená su enkarselamentu pendiente di mas investigashon.
