Un caso basta serio di agresion a tuma luga na un restaurant na Palm Beach na momento cu un persona femenino lo a presenta y bira fresco den e establecimento. Situacion a escala y a pidi e persona pa bandona e localidad.
Despues di a duna di conoce cu e ta di Sabana Basora y menasa e propietario cu: “cos no lo keda asina”, el a bay direccion un otro establecimento den cercania, caminda e ta traha. Aki el a bay busca su pareha of un conoci, pa asina regresa y atende cu e menasa cu el a haci na inicio.
Esaki a tuma luga den careda di 8:00 pm, ora cu a pidi presencia di polis y ambulance pa un caso serio di agresion. E muhe, acompaña pa un homber a presenta y dal e propietario un baranca tras di su cabes, habri esaki malamente.
Na yegada di polis a pidi presencia di ambulance mesora mirando cu e kap cu el a ricibi na su cabes tabata uno basta serio. Un rato despues a transporta e victima direccion hospital. Mientrastanto a cuminsa un buskeda den area y aki a surgi un persecucion chikito cu a caba dilanti Yolo caminda a detene e sospechoso masculino.
Ambos tabata den un Nissan March color blanco, cu tabata cuadra cu e descripcion cu e victima a duna. A transporta e persona aki pa warda di polis caminda cu lo tin cu duna cuenta di su acto.
