Team special di polis un biaha mas a haci detention y kita bendedo di droga fo’i riba caya. Esaki a tuma luga den Canoastraat caminda pa algun dia caba ta buscando e sospechoso aki pero no por a dal cu ne.
Diabierna merdia despues di un buskeda, a logra detene e sospechoso aki, cu tin di haber cu bendemento di droga riba caya.
Manera por a corda algun dia pasa durante investigacion relaciona cu cumprament’i droga riba caya, a logra haci varios detencion, entre otro den John G Emanstraat como tambe na altura di Fruteria Virgilio den Boliviastraat na Playa.
Na un cas conoci pa husticia, e topa cu un homber cu droga den su poder y a declara cu el a caba di cumpra droga na un cas den e dicho caya. Ta netamente e cas aki ta unda cu autoridad a tene un entrada hudicial no mucho dia pasa, unda cu a detene varios persona y a confisca varios tipo di droga.
E team special aki, conoci como straatverkoop, a detene mas persona relaciona cu mesun problematica na altura di fruteria Virgilio. Tur cos ta mustra cu a detene mas persona y probablemente a confisca droga tambe mirando cu a pidi cooperacion pa no publica nada te cu comienso di siman.
