Mainta trempan polis a bin atende cu persona poco altera den area di Spaans Lagoen cu a causa molester na prodiedad di hende. Na yegada a bin topa cu propietario di un cas dilanti lama wardando patruya yega pa asina duna su version di kico a tuma luga na su propiedad.
Esaki a sosode den careda di 7:45 am, ora cu un persona lo a tira piedra den direccion di un villa y causa destruccion y kibra glas. E persona tabata un rato prome den area, tabata altera y gritando insulto / palabra malo den direccion di e doño di luga. Na momento cu polis a presenta e no tabata na sitio mas.
Mientras cu polis tabata tumando datos, e persona aki tabata acercando e area bek. Polis a bay den su direccion pa asina saca afo si enberdad el a comete e destruccion y e motibo di esaki. Segun por a compronde, e persona lo tabata rabia cu e tin di defende su mes di cacho cu e propietario ta laga los, y cu ta atak’e cada biaha mientras cu e ta den e area.
Polis a hala atencion di e doño di villa pa e descuido di laga su mascota los y su comportacion, y di otro banda a deten’e e persona pa destruccion cu el a comete na propiedad aheno. Un rato despues a transporte pa warda di polis.
