Minister di Salubridad Publico Dangui Oduber ta informa cu e registro pa participa na e “Request For Proposal” (RFP) pa cultivo y procesamento di Cannabis a termina dia 26 di februari 2021 ultimo. Tin gran interes demostra den e parti di cultivacion y procesamento di Cannabis pa uzo medicinal na Aruba.
E proceso pa pais Aruba conoce un pilar economico nobo ta canando segun plan. E industria di Cannabis medicinal na Aruba lo por genera 100 miyon florin na entrada. E lo por crea 200 cupo di trabou y e salario averahe di e trabounan aki lo ta entre 3600 pa 4000 florin bruto. Di e 100 miyon florin cu e industria aki lo por genera 12 miyon florin ta bay den caha di Gobierno atrabes di e impuestonan y prima, asina Minister Oduber a trece dilanti.
Tin 3 sorto di RFP cu e aplicantenan por participa pe:
1.RFP pa e cultivacion di Cannabis pa proposito medicinal na Aruba, pa esaki 17 compania a registra pa participa den e proceso.
2.RFP pa e procesamento di Cannabis pa proposito medicinal na Aruba, pa esaki 12 compania a registra pa participa den e proceso.
3.RFP pa e cultivacion y procesamento di Cannabis pa proposito medicinal na Aruba, pa esaki 44 compania a registra pa participa den e proceso.
Den e siguiente paso e compania nan cu ta registra lo ricibi documentonan cu instruccion pa asina prepara nan proposicion. Solamente companianan cu a registra durante e periodo di registracion lo por sigui den e proceso di RFP.
Minister Dangui Oduber ta gradici tur compania cu a mustra nan interes den parti di cultivo y procesamento di Cannabis pa uzo medicinal na Aruba. Un pensamento progresivo pa diversifica nos economia cu industrianan nobo pa futuro ta loke Aruba mester di dje asina Minister Oduber a termina bisando.
