Despues di un luna perdi: A haya mucha muhe na cas di amigo

11159

Awe tardi un poco prome cu 2:00PM, Cuerpo Policial di Aruba a informa cu e mucha muhe Yulie X.S. Naar a aparece bek.

Informacion limita cu a haya te cu awo ta indica cu a logra localis’e na cas di un amigo cu ta biba na Mabon. Mas detaye no tin, ni tampoco na ki ora y den ki estado e mucha muhe aki ta encontra su mes.

Locual cu tabata sa cu ta trata di un hoben di 15 aña, cu nan a mira pa ultimo biaha dia 10 di october, ora cu el a sali for di Orthopedagogisch Centrum na Tarabana pa un salida cu el a haya permiso di OC. Tambe a bisa cu nan a mir’e riba Wilhelminapark, cu ta e mesun fecha di 10 di october.

Desde e dia ey no a tende nada mas. Debi cu e ta un menor di edad, a bay hopi cauteloso cu e informacionnan y no a saca su potret. A pesar di hopi informacion ricibi, no a logra hay’e pa cual den fin di siman a saca un poster cu su potret.

Mientras cu awe tardi ta drenta informacion oficial cu a logra localis’e y cu ta cancela tur buskeda.