Despues di hopi luna: No tin ningun pashent mas di Covid den ICU

4008

Despues di algun luna di hopi reto y presion interno pa atende cu e di dos ola di Coronavirus na Aruba, awe Dr. Horacio E. Oduber Hospital a informa cu no tin ningun pashent mas contagia cu Covid-19 interna den nan unidad di cuido intensivo (ICU). Te cu ayera tabatin un ainda, pero awe Hospital ta raporta cu tin 0 pashent den ICO y solamente 5 pashent di Covid-19 interna riba piso general.

Cu esaki ta un bon noticia, indicando cu e casonan di berdad a baha di forma drastico y cu esunnan cu ta activo ainda no tin mucho sintomia y pio ainda cu e ta haci nan asina malo cu mester interna den hospital. Esey ta masha importante den e lucha contra Coronavirus, pues no solamente pa e contagio, sino con ta atende cu esunnan contagia pa evita cu nan ta bira malo cu chens di haya complicacionnan mas serio y hasta fayece den e proceso.

Esaki ta por lo menos un di e unidadnan di Cuido Intensivo den Dr. Horacio E. Oduber Hospital. Semper tabatin 6 unidad special asina, pero dor di e pandemia, cu ayudo di Gobierno di Hulanda, a expande e capacidad te cu 30 unidad. Mayoria pashent interna eyden dor di Covid-19 ta debi cu nan a haya complicacion cu halamento di rosea, pa cual mester pone nan riba mashin.

Mirando e caida den casonan nobo, por premira cu den algun siman mas nos lo no tin casonan mas riba nos isla. Awe, despues di hopi luna nos ICU na Hospital ta Covid-Free, cu speransa cu e ta keda asina tambe por lo pronto. E personal adicional, paga dor di Gobierno di Hulanda, cu a bin for di Merca pa yuda Aruba, lo keda te fin di aña. Nan lo duna un man awo pa por keda cla di eherce tur e trabounan di operacion cu a keda pega debi na e pandemia. Tambe pa por duna e empleadonan di Hospital un chens pa descansa y baha cu nan vakantie bon mereci.