Dialuna merdia, señora Brenda tabata tin tiki problema pa haya su materialnan, pa por yud’e cu su salud. Pero awo, tin bon noticia. E peticion pa ayudo a haya oido.
Despues cu 24ora.com a bay live cu Señora Brenda, dies minuut despues el a haya yamada di AZV. A bis’e cu tur cos lo a bay noord. Despues di a pone core di dokter pa Labco, di Labco pa dokter. Cada biaha un problema, cada biaha bisa cu no, ta fout skirbi, of fout yena, sin tuma consideracion cu e enfermedad di e persona.
Despues di a follow up cu tur hende, sra. Brenda ta manda un danki grandi na Labco. Un gratitud inmenso pa e trahadonan di Labco. Specialmente esnan cu mester trata cu tur e papelnan, email, pa e hendenan haya nan aparatonan.
Nan tabata all out cu sra. Brenda. Mas bien nan tabata tin hasta duele di a wak cu di tanto ora. For di 9’or y mey di mainta, sra. Brenda a keda cla 3’or y 20, cu nan a manda e papel, door cu el a keda yama. Sra. Brenda a keda insisti pa e haya su cosnan.
Sra. Brenda tin un pia malo cu ta hincha mahos. Pronto e lo cuminsa cu e terapia pa e pia.
Awo sra. Brenda ta hopi mas trankil despues di su odisea. E no ta cansa su heup ni su braza awo cu e tin e sosten, cu el a ricibi. Si e cansa mes, e ta pone e brake y ta sinta un rato, lanta y e ta sigui. Awo por bisa cu e ta bibando un 50% normal, facil e no ta. E ta gradici Dios cu e tin su pia, pasobra hopi no tin’e. E ta sigur cu e ta wordo sana un biaha mas. Sra. Brenda ta un persona di hopi fe. Tambe el a gradici 24ora.com, pa asina informa pueblo kico ta pasando.
Un conseho e tin tambe pa AZV. Cambia nan sistema, pasobra sra. Brenda no por kere cu door di nan informacion, ta un psikiatra ta dicidi ken ta haya aparato of no. Su pregunta ta, psikiatra ta sinti pa cada pashent?
Sra. Brenda mes no a papia cu e psikiatra. E ta na man di psikiatra 8 aña despues di a perde su yiu. Kiermen no bin papi’e mes di un psikiatra. Si un neurologo, un specialista ta manda un papel pa un ordo di algo, con un psikiatra por ta mas halto cu un mas studia cu sa kico e pashent su malesa ta.
Unda Aruba ta bay asina, sra. Brenda ta puntra su mes. Esaki ta e bon gobernacion, cambio di salud? El a ripiti cu e sistema di AZV ta dokter di cas mester gana placa, botica ta gana. Ora cu nan no por mas, e ora ta manda e pashent specialista, tambe mester gana. Ora cu e pashent no tin manera mas pa wordo yuda, amen sampet macuri, pasobra funeraria tambe tin cu gana. Kico e ora AZV kier haci? Caba cu e bieunan? Esey ta loke sra. Brenda tin pa nan.
E ta pidi pa cambia nan sistema, pensa mas riba salud di hende, pasobra dimes, sra. Brenda ta un persona cu for di su 17 aña ta traha y awo e no por mas.
E ta pensionado, pero asina mes e ta pagando su AZV den cada compra cu e haci. Si e bay Chines, haci un compra y lubida algo, cada biaha cu e bay, e mester paga 6%. Awel, no ta limosna e ta pidi. Esaki ta su derecho.
Por lo general, sra. Brenda ta contento di a keda cla. E ta sinti su mes mas sigur awo cu el a ricibi su sosten y cu awo e por cana hopi mas sigur. Esey ta hopi importante pa sra. Brenda.
