Despues di 22 aña ta bini investigacion riba problema di droga

15

Durante un conferencia di prensa diabierna mainta e fundacion FADA (Fundacion Anti Droga Aruba) Ruliënne Arends, Trahado Preventivo a anuncia hunto cu Glenn Sankatsing di Quest to Rescue Our Future, cu ta bay realisa e investigacion nacional riba uzo problematico di droga y alcohol.

“Adiccion di droga ta causa hopi inseguridad y problema social na Aruba. E ultimo dies añanan e situacion na Aruba a bira pio. Nos ta mira famianan kibra, un impacto negativo riba educacion di e generacion nobo y daño na nos productividad laboral. Tur hende cu tin un ser keri cu a cay den droga ta consciente di e problemanan social cu esaki ta trece cun’e y ta sinti e impotencia di no por haci nada. E noticianan ta mustra un efecto preocupante riba e pilar economico di Aruba cu ta turismo,” esaki Glenn Sankatsing di Quest to Rescue Our Future a bisa.

Como comunidad tin e obligacion pa atende e problema grandi aki, pa protege nos comunidad,pa evita cu nos hendenan mas vulnerabel ta bira victima y pa para e tendencianan actual cu por haci un daño ireparabel.

FADA: Onderzoek tocante adiccion na Aruba

Posted by 24ora on Friday, July 12, 2019

E delaster investigacion nacional riba e impacto social di droga na Aruba a tuma luga 22 aña pasa y ainda e ta wordo uza frecuentemente. Pero e situacion a cambia y a bira mas problematico, pasobra ‘nos no tin e problema di adiccion bao di control. Tin necesidad pa haci un investigacion nacional actualisa y mas amplio pa por bin cu programa y proyecto efectivo pa reduci e impacto negativo di droga na Aruba.”

Den e conferencia a anuncia e inicio di e Investigacion Nacional Uzo Problematico di Droga y Alcohol na Aruba,riba encargo di Ministerio di Turismo, Salubridad y Deporte y Ministerio di Asunto Social y Labor den cuadro di e Crisisplan Social. Caribbean Reality Studies Center, un centro di investigacion Arubiano cu 20 aña di experiencia, ta responsabel pa e investigacion cientifico aki, cu lo envolvi tur stakeholder riba tereno di droga. E investigado principal ta Dr. Glenn Sankatsing cu a haci e investigacion nacional riba e impacto social di droga na Aruba na1997. Lo tin cooperacion estrecho cu tur organisacion cu tin di haber cu e efectonan negativo di abuso di substancia, cu prevencion, rehabilitacion y resocialisacion.

E investigacion lo identifica e factornan di riesgo cu ta laga un persona bira un uzado problematico di droga of alcohol y cu ta lag’e cay den adiccion y aislamento social. Un uzado casual, cu tin biaha ta dal un drinks of uza un substancia prohibi no ta un problema social, si no tin otro factor di riesgo. E investigacion nacional aki lo concentra riba e uzado problematico di droga of alcohol, pa por identifica e causa y factornan cu ta haci un persona vulnerabel pa adiccion.

Despues di 22 aña ta bini investigacion riba problema di droga

Despues di 22 aña ta bini investigacion riba problema di droga. Click e link pa mas https://24ora.tv/32pCNgg

Posted by 24ora on Friday, July 12, 2019

Ta dificil pa haya respuesta valido cu un entrevista sensitivo di un uzado di droga. Esey ta e motibo pa haci e investigacion den dos fase pa cubri e tema cu un combinacion di investigacion mas chikito. E prome fase tin dies investigacion pa haci un diagnostico di e uzo problematico di droga y alcohol. E di dos fase tin shete investigacion cu ta studia e clientela di cinco organisacion di rehabilitacion y cu ta traha e historia di bida di 50 uzado problematico rond di Aruba, pa identifica e situacionnan di vulnerabilidad y riesgo. E resultadonan combina lo duna un bista completo pa por bin cu accion concreto.Finalmente,e resultadonan lo wordo presenta na tur instancia di gobierno y priva riba e tereno concerni, pa asina por haya feedback pa ofrece un strategia y programa di accion practico.

E enfoke central di e investigacion no ta combatimento di malesa, sino promocion di salud. Un curpa y un sociedad saludabel ta e miho proteccion y prevencion contra malesa fisico y social. Ora nos a identifica e condicionnan social, cultural, psicologico y economico cu ta haci un persona vulnerabel of cu ta crea circunstancia di riesgo, nos tin un cuadro solido pa un strategia mas eficiente.

E investigacion aki ta conta cu e cooperacion y sosten di nos comunidad cu ta consciente di e importancia di e tema aki. Particularmente lo envolvi instancia y persona cu tin di haber cu e problema aki, pa haya nan cooperacion maximo. Cu e esfuerso di tur hende aki un aña nos por implementa un strategia basa riba e resultadonan di un investigacion cientifico cu por yuda nos reduci e impacto social negativo cu droga tin riba nos comunidad.