Cashi ta pa paña, cashi no ta pa hende. Sali di e cashi, sea bo mes y sea feliz

Pa cera luna di juni, e luna yama “Pride Month” bou di e comunidad LGBT (Lesbian, Gay, Bisexual and Transgender), Mark Bensen Denz, CEO di Headlines Group (24ora.com) a combersa cu un activista di derechonan di e comunidad aki. Ta trata di Desiree Croes, Abogado di profesion.

Su envolvimento a cuminsa for di momento cu el a drenta politica y ora cu e comunidad a constata cu e tabata den un relacion cu hende muhe. “E tabata un lucha cu si mi no tabata kier mes mi a haya mi mes envolvi den dje. Asina el a haya sa hopi mas di e comunidad aki.

El a papia di su experencia internacional y localmente. Si e mester haci un cooperacion cu antes y awo, e no por conclui otro cu e aceptacion social ta hopi mas grandi, e hendenan ta compronde hopi mas.

Pa loke ta ley, e aceptacion mas grandi pa e comunidad tabata e Amiendo no. 7 na september 2016, pero lamentablemente su ehecucion no a logra ainda. El a cana henter su caminda y ta bek na Parlamento. El a pasa hunto cu otro 800 cambio, pero e cambio mas grandi di tur esaki tabata amienda no. 7. Esaki ta nifica cu door cu e ta un “rechtsfiguur” nobo, e mester cambia den tur otro leynan unda cu e ta aparece, of cu tin relacion cu codigo civil. Pero ta casi 4 aña leu. El a drenta Parlamento fin di aña pasa, sinembargo ainda no tin un fecha pa trat’e.

Desiree Croes, activista di LGBT: Cashi ta pa paña, cashi no ta pa hende. Sali di e cashi, sea bo mes y sea feliz

Desiree Croes, activista di LGBT: Cashi ta pa paña, cashi no ta pa hende. Sali di e cashi, sea bo mes y sea feliz. Click e link pa mas https://24ora.news/2ZhGIe0

Posted by 24ora on Tuesday, June 30, 2020

Croes ta kere cu e tardansa ta debi na su aspecto politico unda cu hopi tin miedo di kima nan dede. E tardansa aki ta afecta tur e cambionan den e Burgerlijk Wetboek, unda tin cambionan entre otro den ley di herencia, unda por deshereda yiu. E tardansa no ta hustifica, pasobra el a pasa caba den Parlamento. Nunca antes a yega di sosode den Reino Hulandes cu un ley a tarda asina hopi pa su “invoering”. Inclusive den un reciente veredicto Hues a bisa cu Gobierno mester cumpli cu e comunidad LGBT.

Registro di matrimonio na Aruba ta bay stroef pero unabes cu manda carta, e proceso ta cuminsa mobilisa. Pa no mester registra y pasa e proceso aki, e unico solucion ta pa permiti matrimonio homosexual na Aruba. Croes ta bisa cu tin respet pa tur hende cu tin otro pensamento, pero personanan di e comunidad LGBT ta cumpli cu pago di impuesto manera tur otro ciudadanonan y mester por tin nan derechonan tambe. “Pero nos no tin e mesun derecho. Inclusive Benvinda cu mi tin un caso contra SVb pa su pensioen como señora casa. E ta skirbi cu e ta casa, pero e ta haya pensioen di soltero. Esaki no ta cuadra. Pensioen no ta un regalo. E no ta cuadra cu un pareha Arubiano mester sali di Aruba, gastonan extra pa nan famianan compañanan pa bay casa na Boneiro.”

Pa loke ta e cambio di mentalidad cu personanan hoben ta sali bin dilanti mas lihe pa bisa cu nan ta homosexual. Nan ta sinti nan mes hopi mas sigur. “Tempo di mi tempo e tabata mas dificil, corda tempo di nos mayornan. E tempo ey e cosnan tabata hopi scondi.” Awendia masha poco ta esnan bou 40 aña cu tin problema pa sali afo y bisa cu nan ta gay.

Con tabu e tema aki ta bou di e comunidad aki unda cu basta hende lo cay bou di e comunidad LGTB ta keda ilustra den storianan cu sa tende. Na prome luga un persona mester acepta su mes prome cu otronan rond di dje por acept’e. Asina el a conta e storia di un señora di 72 aña, kende semper a sconde y por a bini afo te ora cu e tabatin 72 aña, despues cu su ruman homber, kende tabata contra homosexual a fayece. El a bisami “porfin mi por a sali di closeth”. E no por a hacie nunca pasobra tabatin un ruman cu e tabata sinti cu nunca lo a acept’e. E situacion aki ta hopi erg. Dia mi a scucha esaki mi a bira hopi tristo. Mi a pensa cu el a tira su bida y felicidad afo. Hopi lamentable. Esaki ta pasa ora un persona no ta durf pa ta su mes, pero mi no por ni ta husga ningun hende tampoco. E ta dificil pa bo ta  bo mes den un comunidad hopi chikito. Nan ta huzgabo.”  

“Hopi hende grandi ta bisami no necesariamente mi ta acepta pero mi ta respetabo. Nos a desaroya den direccion positivo. E ta cambiando positivamente. Mi ta spera nos sigui riba e caminda aki y cu pronto Aruba conoce matrimonio igualitario y cu comunidad transgenero por  cambia nan sexo oficialmente na Aruba. E isla no mester haci esaki cu su ciudadano. E mensahe ta hopi simpel: respeta tur persona. Lastima cu mester bay Corte. Tempo mi a casa cu un hende homber mi tabatin tur derecho, te ora cu mi a lague y casa cu un hende muhe. Ey mi a perde tur derecho. Esaki no por. Mi no por a nace cu tur derecho y na caminda leynan ta dicidi cu mi ta perde cierto derechonan. Nos ta sigui lucha pa e derechonan.”

Pa finalisa el a bisa cu tin hopi hende den closeth y e kier bisa “Cashi ta pa paña, cashi no ta pa hende. Sali di e cashi, sea bo mes y sea feliz.”