“E problema ta cu a pidi subsidio di salario pa trahadonan. Nan nomber a bay den e sistema. SVb a keda sin paga y e trahadonan no por solicita pa FASE. Asina Gobierno ta laga decenas di trahado sin entrada y sin contesta”, asina Desir Jean Emmanuel, Director di Youth Contractor a bisa awe. “Ami ta para na banda di mi trahadonan, pasobra sin nan, mi no tin contratista y mi no tin trabou. Pero si SVb no pagami, mi’n por haci mucho tampoco”.
E administrador di e compania a sigura cu na luna di mei SVb a paga Youth Contractors un suma di riba 300 mil florin como subsidio di salario na su trahadonan. Di e suma ey a resta como 30 mil florin cu ainda nan ta na mesa cu SVb pa mira unda a paga di menos pa por “trek” e “recht”. Pero na luna di juni nan no a haya subsidio mes.
Email pa SVb no ta haya contesta y yamadanan di telefon pio. Despues di protesta di e trahadonan y e rol di medionan di comunicacion, mesora SVb a activa y a saca un man pa yuda. Marieta Tromp ta e empleada di SVb asigna pa soluciona e problema cu a presenta. Youth Contractors ta sinti cu e eror ta cu ora a “upload” e file online riba e portal di SVb, cu algo lo a bay robes. Pero en bes cu SVb yama pa bisa cu algo no ta bon, a opta pa djis no paga nan, cu consecuencia cu hopi trahado ta keda sin un pan riba mesa. Y ora nan pidi FASE pa toch por come, ta bisa nan cu nan mester haya subsidio di salario. Pues ta laga nan “tussen wal en schip” y ningun alma pa saca un man pa yuda nan tampoco.
Youth Contractors a bisa di otro banda di a haya contacto cu Director di SVb, ir. Edwin Jacobs cu a scucha nan situacion y a apunta Marieta Tromp riba e caso pa por busca un solucion. Entretanto diahuebs SVb a bishita nan oficina, a repasa e documentonan y a keda di duna contesta bek diabierna. Probablemente dor di nan agenda pisa nan no a logra, pa cual ta spera cu pa dialuna awo si lo por bon claridad riba e pregunta cu si e trahadonan di Youth Contractor lo por cobra ainda of no.
