A dura largo pero cu tur e retonan di Gobierno pa cumpli cu presupuesto acorda cu CAft, no tin mas espacio pa sigui carga e operacion di Serlimar sin cu por garantisa entrada. Pesey awe Serlimar a menciona cu awo si ta cuminsa cobra pa luna pa recoge sushi domestico. E tarifa ta stipula na 25 florin pa luna y ta conta mesun cos pa tur ciudadano, cu un maximo di dos bari di sushi pa cada cas. Cu e anuncio aki, definitivamente awor lo start e “guera” pa e mercado di recogemento di desperdicio domestico, entre e dosnan di mas grandi, Serlimar cu ta di Gobierno y Ecotech cu ta un compania priva.
Ecotech ta domina e mercado comercial y Serlimar e mercado domesico
No ta un secreto cu Ecotech ta domina como 90% di e mercado di sushi comercial, cu ta inclui hotelnan y negoshinan tur rond di nos isla. Sinembargo den recogemento di sushi domestico Serlimar ta domina cu un gran mayoria. Cu e cambio den ley aki y obligacion pa paga, ta evidente cu Serlimar awor lo purba conkista e mercado comercial mas ainda y retene su mercado domestico, mientras Ecotech sin duda lo purba retene su mercado comercial y bay tras di e bolo grandi cu tin pa parti den recogemento di sushi domestico.
Historia di cobramento pa recoge sushi domestico
Ta desde aña 2005 cu Minister Booshi Wever a anuncia cu Serlimar ta cuminsa cobra un suma pa luna pa cada cas, nunca mas politicamente no a logra ehecucion completo di e plan ey. E tempo ey Minister Wever a pasa e ley pero a bisa mesora den Parlamento cu no ta cuminsa cobra tanten cu no por garantisa servicio optimal na clientenan.
Den comunidad semper a keda mira e cobransa como un medida extra y cu pueblo ta paga belasting caba y den e placa ey mes mester cubri gastonan di Serlimar. No obstante cu tur pais na mundo incluyendo tur rond di nos ta normal cu ta cobra pa recoge sushi, toch mayoria den comunidad no a mire asina.
Na aña 2015 bou Gobierno di AVP, Minister Benny Sevinger a cuminsa cobra pa luna. El a fiha e tarifa atrobe na 25 florin pa luna y un porcentahe mucho abou di comunidad a cumpli cu e pago mensual. Esaki mientras sindicato FTA e tempo aya a conseha pueblo pa NO paga!
Gabinete Wever-Croes a lansa un contraproposicion aña pasa den cual esunnan cu tin un entrada abou lo no paga mes of paga masha poco, mientras cu esunnan cu mas entrada lo paga mas. Un tipo di cobransa social, den cual e brasanan mas hancho ta sostene esunnan cu e brasa mas smal. Esey tampoco a logra politicamente.
Awo si….25 florin pa luna
Sinembargo awe Serlimar a anuncia cu awor si ta cla y cu definitivamente ta cuminsa cobra entrante dia 1 di maart 2019. Por paga pa luna Awg. 25.00, pa cuartal Awg. 75.00, mita aña Awg. 150.00 of un aña completo Awg. 300.00. Pa e aña 2019 lo cobra solamente e 10 luna nan restante di e aña cu ta cuminsa entrante luna di maart te cu december di 2019 cu ta un suma di Awg.250.00. Por haci pago na oficina di Serlimar na Tanki Flip of San Nicolas y pronto na Pos Chikito. Tambe por haci pago na tur oficina di MFA, via online banking of standing-order na bo banco preferi.
E tarifa residencial ta un cobransa cu ta valido pa cada cas of punto di coleccion cu ta ricibi e servicio optimal di coleccion residencial y cu tin un mini-container di Serlimar. Cada cas of punto di coleccion por tin maximo 2 mini-container residencial. Si ta desea mas cu 2 mini-container lo stap over pa un tarifa comercial y lo ricibi container comercial.
E ley nobo ta permiti alternativa
Clientenan di Ecotech N.V. of otro compania lo bin na vigor pa un dispensacion di e tarifa residencial conforme cu ley nan existente. Pa bin na remarca pa e dispensacion aki mester hiba un comprobante cu ta cliente di otro compania y no di Serlimar.
Diferencia di tres florin pa luna
Mester menciona cu e tarifanan pa recoge sushi domestico ta casi mesun cos. Ecotech ta cobra Awg. 28.10 y Serlimar Awg. 25.00 ambos ta inclui BBO/BAZV/BAVP den e tarifa.
Con lo incentiva esunnan cu a paga Serlimar tur tempo?
Pa cliente nan di Serlimar cu a paga aña 2015 te cu 2017 y 2018 por tuma contacto directo cu Serlimar na 5245080 pa haya mas informacion di nan incentiva. Pensionado nan y persona nan cu tin onderstand of bijstand por tuma contacto of pasa personalmente na Serlimar na Tanki Flip of San Nicolas pa mas informacion di e suma cu nan mester bai paga di e tarifa residencial.
Serlimar: Awor ta ora pa paga y aporta na un Aruba limpi
Serlimar ta para tras di e pensamento cu a yega tempo pa nos tur, como un comunidad, forma parti di e desaroyo di maneho di desperdicio cu ta na bienestar di Aruba. Cu bo contribucion di e tarifa residencial, hunto nos por logra yega na nos meta pa sigui cuida y proteha nos medio ambiente.
