Awe Dr. Horacio E. Oduber Hospital a manda informa tur empleado den un memo interno, cu awe tabata ultimo dia di trabou di dokter Alex Schwengle. E specialista di pulmon a baha cu vakantie y desde dia 1 di juli 2021, e ta cuminsa traha na hospital di Boneiro den e funcion ekivalente na Chief Medical Officer, esta un sorto di director medico. Pa e specialista esaki ta un crecemento den su carera profesional como dokter y cu experiencia den liderazgo.
Alex Schwengle a cuminsa traha cu dr. Horacio E. Oduber Hospital dia prome di december 2009, como specialista di pulmon. Sigur e tabata un bon guia den hospital pa su coleganan y a traha pa yega na un miho reparticion di camanan. Na november 2013, el a sali parcialmente di hospital pa drenta politica y asina a bira Minister di Salud Publico encarga cu, entre otro, e proyecto di ampliacion y modernisacion di hospital mes. Ta bisa parcialmente pasobra semper a dedica algun ora na su profesion, na cual el a regresa den tempo completo na november 2017. Pa mas informacion, lesa e edicion di mañan di matutino TREMPAN.
