Despues cu Minister Andin Bikker den su conferencia di prensa a splica cu e coach no por a yuda cu su permiso no por a sali, mesora den nos inbox a aparece prueba cu desde 18 di juli caba DIMAS a nenga permiso di e entrenado Venezolana. Den e carta, cu nos ta mustra aki como prueba, ta aparece e motibonan cla dicon no por legalisa un turista cu pa malo a keda atras y burla di leynan di Aruba.
Den un carta cune titulo “Afwijzende Beschikking”, e Departamento di Integracion, Maneho y Admision di Stranhero (DIMAS) a manda informa Eliana Yinneth Gonzalez-Valles naci na Venezuela, cu ta nenga e peticion cu el a haci pa alarga su estadia di turista pa e warda un permiso di trabou. Desde aña 2015 caba tin un maneho den cual e stranhero pidiendo un prome permiso di estadia/trabou mester warda contesta pafo di Aruba.
DIMAS a constata sinembargo cu e coach aki a drenta Aruba e ultimo biaha dia 4 di januari 2018 y cu un permiso di turista pa 30 dia. Pero pa malo el a keda na Aruba y nunca mas a regresa Venezuela, mientras cu e mester ta consciente cu mester warda su permiso pafo di nos isla. Pesey a neng’e.
E splicacion di Minister Bikker, cu awor ta bisa cu el a continua cu maneho di Minister Sevinger relaciona cu deportista y/of coachnan, no ta cuadra. Den dicho maneho no ta haci excepcion pa coachnan cu bin Aruba como turista y deliberadamente keda atras pa traha, sin tin un permiso pa haci tal.
Cu e maneho di Gobierno MEP-POR-RED, tur otro Venezolano cu keda Aruba ilegal mester por haya e mesun trato y excepcion pa un permiso di estadia y di trabou. Si pa “Eliana” ta haci excepcion pasobra Gobierno Venezolano no ta sacando papel di bon conducta apostilla, e ora mester haci excepcion pa tur otro Venezolano cu tambe lo tin e mesun problema. E maneho di excepcion aki di Minister Andin Bikker ta precisamente locual ex Minister Booshi Wever a critica awe mainta. A priminti cambio, pero awe Bikker ta bisa cu el a sigui maneho di Sevinger pasobra gobernacion ta continuacion. Pero no ta e mesun maneho a critica 8 aña largo? Pero awo ta aplica e mesun maneho, pero bou un otro asignatura politico.
