Desde dialuna awor: iTV Canal 49 lo conoce otro destino

Recientemente SETAR NV a informa Headlines Group (Operadornan di 24ora.com, 24ora en Espanol y iTV Canal 49 ) cu nan kier cambia e destino di e canal pa un canal turistico. Despues cu a start e deliberacionman, a stipula cu fin di Maart 2019 lo ta e ultimo dia di transmision. iTV Canal 49 a bay den aire 9 aña pasa pa por duna e comunidad local e oportunidad di mira noticianan di 24ora.com riba television. 

Cu un sistema automatisa, e canal di television tabata sincronisa cu e website mas grandi di Aruba. Specialmente esunnan di mas edad tabata aprecia esaki hopi. Tambe transmisionnan bibo riba 24ora.com manera e.o Futbol local, Arubadag, Carnaval di Sint Maarten y di Aruba tabata pasa riba Canal 49. Na dado momento a join tambe cu emisora Cool FM unda cu por a mira locutornan di radio live na television.

Nos por compronde cu Setar NV como doño di e red di Cable lo lansa un canal turistico yama Aruba TV. Esaki lo ta un programacion specifico pa turistanan cu ta riba nos isla.

Pa Headlines Group e cambio aki ta cuadra cu e strategia di futuro unda cu television tradicional ta perdiendo hopi sintonia. Comparabel cu e cambio di corantnan imprimi pa corantanan digital manera e.o 24ora.com. E segmento di audiencia cu ta mira television por medio di rednan manera Netflix, Apple TV, Roku y otronan ta creciendo cu miyones di televidente. Pa Headlines Group e tecnologia aki tambe lo forma parti di e canalnan cu nos ta uza aparte di nos website, app y rednan social. 

Un ehempel recien ta cu 24ora.com na luna di Februari 2019 a goza di un sintonia di 3.1 miyon di minuut di materialnan di video publica riba nos website. Un video di un suseso facilmente ta yega entre 30 pa 40 mil view. Nos video miho mira, ta esun di detencion di ilegalnan na Lago Colony aña pasa cu a conta cu un audiencia di 226 mil view. Na di dos luga ta bin e entrevista cu “Clarita” cu 220 mil view. Esaki ningun canal di television riba cable ta alcansa! Pues bisando esaki e potential di media di rednan social y networknan digital ta hopi mas grandi cu television tradicional.

Nos kier gradici tur televidente cu tabata sigui e noticianan riba Canal 49 y ta informanan pa keda pendiente pa e plannan di futuro pa cu programacion riba television digital/online.