Tabata pa mas o menos 11:25 pm di diasabra anochi cu e compania Integrated Security a haya melding di un candela den Dijtham, situa na Schotlandstraat # 67 na Eagle. Mesora a pidi presencia di Brandweer pa combati e candela cu tabata concentra den e edificio.
Bombero no tabatin e facil pasobra e luga tabata cera y no por a localisa gerencia. A opta pa kibra un bentana pero a topa e ora cu hero di siguridad, cu tambe mester a corta pa por a bay paden. Ey a topa cu un fan completamente na candela. A spuit y paga e candela mesora.
Charline Luydens, manager na Dijtham Aruba a conta cu nan tabatin dos dia hopi ocupa cu un baratio. A bende paden y pafo, estilo “tent sale”. Cansa trahadonan a bay cas y esey a causa cu no a mira e celular mesora ora tabata yama cu tin candela den e establecimiento.
Dijtham ta forma parti di un compania grandi cu tin sucursal na Aruba, Boneiro, Corsou y Sint Maarten. Nan ta specialisa den benta di verf, “tools”, mashin y “fasteners”.
Luydens no ta kere cu lo claim seguro pasobra e daño tabata limita na djis e fan y huma den e luga. E por tabata hopi mas pio, pa cual nan ta masha gradici na e intervencion rapido di Cuerpo di Bombero Aruba cu a presenta cu varios unidad mesora na e sitio. A yega cu maximo urgencia y cu hopi unidad, capaz pa atende un posibel candela den un hardware store cu verf den dje y otro productonan cu por pega na candela lihe. Danki Dios no tabatin mester di bay den accion pasobra e prome unidad mes a combatie mesora.
Kico a causa e candela no ta conoci. Charline Luydens a confirma si cu e candela a keda limita na e fan. E no por bisa sigur si pa un descuido a bay lag’e cendi of si e tabata djis geplug den coriente y door di un kortsluiting a pega na candela. El a conseha tur hende cu, pa evita e tipo di situacionnan asina, cu lo ta miho saca tur artefacto electrico for di coriente ora di bay cas.
Awo a keda di habri tur porta y bentana di e tienda pa aire por circula y saca e holo di huma cu a keda eyden. No ta un proceso di algun rato, sino lo dura un bon rato prome cu e huma por sali y cu e holo den e establecimiento por normalisa.
