Durante e seminario ku a tuma lugá djaweps, dia 6 di desèmber último, den oula di Universidat Nashonal di Kòrsou (UoC) pa konmemorá e di désimo aniversario di e ordenansa ku a instituí e órgano di diálogo i konsulta entre gobièrnu, komo dunadó di trabou, i representantenan di empleadonan públiko, mihó konosí komo CGOA (Centraal Georganiseerd Overleg in Ambtenarenzaken), Promé Minister sr. Eugène Rhuggenaath, den su diskurso di apertura, a enfatisá riba e echo ku un agènda eksitoso pa yega na un desaroyo ekilibrá i duradero di nos pais ta rekerí ‘partnerships’ riba tur nivel.
,,Den diálogo habri ku otro mester por yega na solushonnan duradero, palabrashonnan konkreto i aktua konforme ku loke a ser akordá dor tur esnan envolví. Un diálogo habrí entre partidonan den CGOA lo mustra komunidat ku e konvenshon number 151 di Organisashon Internashonal di Labor ILO ku a ser ratifiká dor di Kòrsou na aña 2016, no ta un konvenshon sin nifikashon, pero ta algu ku Kòrsou ta duna kontenido real na dje den seno di CGOA”, asina e promé mandatario a trese pa dilanti, enfatisando e importansia di funshonamentu di e órgano bipartit i tambe di konvenshon 151 di ILO ku ta regardá relashonnan laboral den servisio públiko.
Mas aleu sr. Rhuggenaath a trese pa dilanti ku gobièrnu ta duna balor grandi na diálogo sosial, ku tabata e tema prinsipal di e seminario, i ku su gabinete lo sigui komprometé su mes pa ,,sigui fomentá diálogo i partisipashon real den materianan di interes general pa asina krea aseptashon pa maneho gubernamental”.
,,E diálogo sosial ku ta tuma lugá periódikamente den seno di CGOA entre gobièrnu i representashon sindikal di empleadonan públiko riba posishon huridiko di ámtenarnan i riba maneho di personal ta algu di aploudí ya ku e ta enrikesé nos demokrasia”.
Diálogo sosial komo hèrmènt pa gana konfiansa
Komo oradornan prinsipal di e seminario, ku por a konta riba presensia di mandatarionan, parlamentarionan, lidernan sindikal i representantenan di sosiedat sivil, a hiba palabra dos eksperto di ILO, srs. Carlos Carrión-Crespo i Rainer Pritzer, kende a elaborá en ekstenso riba e echo ku e instrumento di diálogo sosial, den kualkier forma (bipartit o tripartit) i riba kualke nivel (entre e.o. dunadó di trabou i empleado o entre gobièrnu i representashon empresarial i sindikal), ta un proseso gradual ku ta tuma su tempu i ku e no ta un evento aislá. Hasiendo uso di ‘best practices’ den region di Karibe i tambe mundialmente nan a demostrá ku diálogo sosial ta un instrumènt fuerte pa fomentá konfiansa. ,,Pa diálogo sosial den kualkier empresa, organisashon, pais i/o region por ta realmente efektivo, e mester kumpli ku kuater rekisito básiko. Na promé lugá, partidonan mester demostrá rèspèt pa otro i respetá otro su derechinan fundamental. Na di dos lugá, e partidonan ku ta bai den diálogo ku otro mester ta fuerte, representativo i independiente. Na di tres lugá mester tin e boluntat i komitment pa yega na resultadonan efektivo i por último partidonan mester por konta ku sosten institushonal adekuá.”
E ekspertonan di ILO, mas aleu, a enfatisá riba e benefishinan di diálogo sosial ku, konforme stándarnan di ILO, ta ,,un hèrmènt poderoso pa yega o mantené koheshon sosial, realisá pas i stabilidat, promové konsenso, drecha kondishonnan di trabou i di bida, motivá empleadonan, alsa produktividat, yega na progreso ekonómiko i desaroyo sostenibel i empoderá demokrasia i bon gobernashon.”
Honra pioneronan di Kòrsou
Presidente di CGOA prof. dr. Valdemar Marcha a trese den su diskurso pa dilanti ku e seminario a ser dediká tambe na e pioneronan di sindikalismo i kooperativismo na Kòrsou, esta dr. Moises Frumencio da Costa Gomez i pader Amado Römer.
Pa mas informashon por bishitá e siguiente sitio riba wèpsait: www.cgoacuracao.org
